Espinoza: Madayon kaha ang reclamation project sa Consolacion?

Espinoza: Madayon kaha ang reclamation project sa Consolacion?

PAMINAWON kaha ni Presidente Rodrigo Duterte ang petisyon sa mga namuyo sa kababayonan sa Barangay Tayud, Consolacion, nga ang kadaghanan kanila mga mangigisda, nga dili ipadayon ang reclamation project nga gitawag nga "Seafront City Project" sa lungsod sa Consolacion?

Dunay 120 ka lumulupyo sa Barangay Tayud nga mipirma og petisyon nga misupak sa reclamation project sa lungsod sa Consolacion tungod kay ang ilang gisaligan sa ilang inadlaw nga panginabuhian mao man ang dagat ug hunasan. Ang pundok nga nagdala sa ngan "Tayud Fisherfolk" nagpadayag sa ilang pagbabag sa maong proyekto didto sa dagat sa Tayud, nga matabunan unya sa yuta kon madayon ang reclamation project.

Ang unod sa ilang petisyon nga gipirmahan niadtong Domingo nag-ingon "mga kabus kami nga lumulopyo (sa Tayud) nga dili makapalit og balay sa mga mahalon nga subdivision o di ba apartment. Nabuhi kami sa pangisda ug panarbaho sa shipyard nga nahimutang sa among barangay. Ang kadaghanan kanamo, sama manindahay, drayber sa habal-habal ug tricycle mokita sa operasyon sa shipyard ug sa uban negosyo sa among komunidad."

Sa imaging semana, ang 2,000 ka trabahador sa shipyard, nga naa nahimutang sa Tayud, nagpadala na sa ilang petisyon ngadto ni Presidente Duterte nga naghangyo usab nga dili ipadayon ang reclamation project kay mawad-an sila og trabaho kon mosira na ang kumpaniya nga moayo sa mga barko kay mawala na man unya ang shipyard.

Aksyonan ba kaha ni Presidente ang ilang petisyon nga nagsingabot na man ang piliay sa sunod tuig? Nakahibawo ta nga ang mga kandidato nanginahanglan sa suporta sa mga botante unya si Presidente Duterte, nga possible nga modagan pagka bise president ug ingon man ang mga opisyales sa lungsod sa Consolacion. Kahibawo ta nga ang dako nga panginahanglanon sa kandidato mao ang pundo.

Gawas sa dakong pundo nga gikinanglan sa kandidato, ang mga local nga kandidato nagkinahanlan usab sa suporta sa katawhan aron modaug. Ang mga kandidato sa pagka presidente, bise presidente, senador, ug party-list ingon man ang kongresista nagkinahanglan usab sila sa local nga mga kandidato o pundok nga modala sa ilang kandidatora.

Sa ato pa, kon aksyonan ni Presidente Duterte ang maong petisyon , iyang balansihon ang iyang desisyon nga di mawala ang suporta sa mga local nga opisyales alang sa iyang mga kandidato. Sa akong tan-aw, ang possible nga mahitabo nga hangyoon ni Presidente Duterte ang mga opisyales sa Consolacion ug developer nga unya nasugdan ang reclamation project human sa piliay sa Mayo 9, 2022.

Di kalikayan kon ang developer nakasugod na og gasto sa reclamation project kay mao man ni ang akong nahibaw-an nga naandan. Apan kon nahatag na ning maong project sa developer, di na angayan nga mabalaka ang developer bisan kon sa sunod tuig na sugdan ang trabaho ig tapos sa piliay.

Unya, kon mahatagan ni Presidente Duterte og solusyon ang problema sa mga maapektohan sa reclamation project, doble ang epekto sa iyang kandidatora ug sa iyang mga kandidato kay mohumot siya sa mga botante ingon man sa mga local nga opisyales nga magpaubos unya sa iyang Partido.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph