CARMEN, Davao del Norte -- Blangko pa karon ang kapulisan sa Carmen Municipal Police Station (MPS) labot sa pagpusil-patay sa usa ka 64-anyos nga lalaki alas 5 kagahapon sa buntag, Oktuber 18, 2021, didto sa Purok 2-A, Barangay Ising sa maong munisipalidad.
Giila sa Carmen MPS ang biktima nga si Alfredo Hino Bernardo, nagpuyo sa Purok 22, Barangay Ising.
Nasayran nga nagbaktas ang biktima gikan sa ilang balay padung sa nahitaboan dihang kalit miabot ang mamumuno dayon namusil gamit ang kalibre .45 nga pistola.
Dunay samad sa dughan ug sa ulo ang biktima nga miresulta sa iyang hinanaling kamatayon, diin nakuha sa iyang posisyon ang mga kuwarta, kuwentas nga naay krus ug usa ka kutsilyo.
Gidala dayon sa Funeria ng Masa ang patay nga lawas sa biktima.
Natahap pa ang kapulisan diha sa ilang imbestigasyon nganong dunay dala-dala nga kutsilyo ang biktima.
Nagpadayon pa ang imbestigasyon labot sa hitabo. (Jeepy P. Compio)