ANG Department of Social Welfare and Development (DSWD) nihatag og financial assistance ngadto sa gatusan ka mga tinun-an kinsa maoy labing kabus sa lungsod sa Tuburan, lalawigan sa Sugbo kagahapon, Oktubre 18.
Sila si Mayor Danilo Diamante, Congressman Alfred Delos Santos sa Ang Probinsyano Partylist ug mga representante sa DSWD nanghatag sa ayuda sa 149 ka mga tinun-an gikan sa 260 ka mga benepisyaryo sa maong lungsod ilawom sa cash education assistance sa maong ahensiya.
Ang tinun-an sa elementary nakadawat og P1,000, ang tinun-an sa high school adunay P1,500 samtang P3,000 para sa mga estudyante sa senior high school kansang lugar maoy kanunay nga gibisita sa Ang Probinsyano Partylist para tunolan og tabang.
Si Delos Santos niingon nga ang lungsod sa Tuburan ang benepisyaryo sa maong programa dinhi sa Sugbo sanglit sila ang dali nga nakaduso sa mga rekisito sama sa mga ngalan sa mga tinun-an.
“Dito sa Tuburan, na-inspire po tayo sa leadership ni Mayor Diamante kaya naman po binalik-balikan po natin ito dahil nararamdaman po natin ang pagmamahal ng Tuburan,” paghulagway ni Delos Santos, kinsa nipasalig nga Ang Probinsyano Partylist mosuporta kanunay sa Sugbo.
Usa sa mga benepisyaryo mao si McKinley Bardoquillo grade 10, taga barangay Calangahan nga giubanan sa iyang inahan nga si Merle kinsa nisakay pa og habalhabal para maabot sa lungsod kansang amahan aduna lay P200 nga suweldo matag adlaw.
Siya niingon nga dako na og tabang ang kantidad nga ilang nadawat labi na nga module ang paagi sa pagtuon ug gamiton sab kini sa project sa bata.
Ang Tuburan adunay libuan ka mga estudyante sa elementary, high school ug senior high apan ang 260 ka mga bata maoy gipangayo nga quota sa DSWD kinsa maoy labing makiangayon nga modawat sa hinabang gumikan sa kalisod sa ilang kahimtang.
Ang pundo gikan sa DSWD apan Ang Probinsyano Partylist maoy nagpili sa lungsod sa Tuburan para mahatagan sa maong financial assistance gikan sa national government.
Ang wala makadawat sa distribution kagahapon, ang LGU sa Tuburan ni Mayor Diamante mo-schedule og laing adlaw para ilang madawat ang nahisgotang ayuda.(PAC)