SA paningkamot nga mahibalik ang kapiskay sa negosyo sa lalawigan sa Sugbo, nanawagan ang Hunta Probinsyal sa Inter Agency Task Force (IATF) nga hatagan og kagawasan ang business establishments nga makadesisyon sa ilang kaugalingon sa mga angay nga ipatuman sa ilang negosyo taliwa ning panahon sa pandemiya.
Ang resolusyon gipangamahanan ni Bokal Glenn Anthony Soco sa sixto distrito atol sa regular nga sieyon sa Hunta Probinsyal.
Usa sa kabalaka ni Soco nga bisan pa man sa paglurang na sa quarantine classification sa lalawigan ug uban pang bahin sa Sugbo, hugot gihapon ang IATF sa ilang mga lagda sa mga business ug tourism estbalishment ilabi na sa kapasidad sa mga makasulod.
“Karon nga nag (general community quarantine) GCQ na ta all the way up to October 31, gisaka lang ang indoor capacity og 20 percent unya ang dining capacity niini sa outdoor to 50 percent. So para nako, it leads to confusion and, at the same time, it's not helpful to the business nga dugay na ning naka-adjust sa Covid.." matod ni Soco.
Ang business establishments una na nga gimandoan sa Kagamhanan sa Lalawigan sa Sugbo sa pagpatuman sa minimum health protocols sulod sa ilang mga tindahan aron malikay sa Covid-19.
Lakip sa mga kamandoan nga giluwatan sa kagamhanan mao ang EO No. 13 series of 2021, EO No. 20 – A series of 2020 ug ang uwahi ang Executive Order No. 41 nga pulos naglatid sa health measures nga angay subayon sa mga establisimento samtang gitugotan kining mag-operate taliwa ning pandemya.
Mga lagda sama sa menos nga kapasidad sa mga makasulod sa establisemento, temperature check, monitoring sa personal details sa mga kustomers alang sa contact-tracing, handwashing areas,disinfectants, table dividers ug uban pa.
“A call is made upon the IATF to allow (business establishements) to self-regulate their operations in order to revert to their former normal operations regardless of quarantine classification while strictly following the health protocols.." saysay sa resolusyon.
Apan subay sa resolusyon ni Soco, gikinahanglan nga hatagan na og kagawasan ang mga establisemento nga mtan-aw sa ilang kaugalingong sitwasyon samtang, ipatuman gihapon ang mga lagda aron makabangon ang ekonomiya sa lalawigan.
Ang resolusyon ni Soco gipasar sa Hunta Probinsyal kagahapon, Oktubre 18, 2021. (ANV)