KAPULISAN sa siyudad sa Sugbo nangandam sa pagdagsa sa mga tawo nga dili bakunado nga moduaw sa mga menteryo sa Oktubre 30, ang katapusang adlaw nga tugotan nga makasulod ang dili bakunado.
Kapin sa 500 ka personnel ang gipakatap sa Cebu City Police Office (CCPO) sa unang adlaw sa pagbukas sa mga publikong sam-ang sa dakbayan kagahapon, Oktubre 18.
Gihulagway sa CCPO nga hapsay pa ang pagbukas sa mga sam-ang diin wala pay daghang nga tawo.
Sa executive order (EO) 101401 nga giluwatan ni Acting Mayor Michael Rama nga gikan Oktubre 18, 2021 hangtod sa Oktubre 30, mamahimo nga makasulod sa mga sementeryo ang dili bakunado nga nagpangidaron sa 18 ngadto sa 61 anyos.
Matod ni Police Lieutenant Colonel Wilbert Parilla, deputy city director for operation sa CCPO, ang matag sam-ang adunay numero kon pila lang ang mahimong makasud matag 30 minutos nga tagal aron dili magdasok.
Ang menteryo sa Pardo ,350 ka tawo ang gitugotan nga makasulod; Labangon, 250; Calamba, 350; Cabantan, 170; Talamban, 150; Carreta nga gidumala Cathedral, 450; ug Santo Rosario, 110.
Samtang ang mga pribadong sam-ang 50 porsiento lang ang gitugot nga maka sulod.
Awhag sa CCPO sa mga Sugboanon nga samtang layo pa ang Nobiyembre 1 ug 2, mag sugod na sila og duaw sa ilang kabanay nga mitaliwan na sa laing kalibotan.
Mahimo pa usab nga maka sulod ang mga gamit sa pagpanglimpyo sa mga nitso hangtod sa Oktubre 30 apan sa Nobiyembre 1 ug 2, dili na kini tugotan.(AYB)