ATUBANGON ni Police Lt. Warlito Toñacao, deputy chief sa Carcar Police Station, ang kaso nga ipasaka batok kaniya sa drayber nga iyang gidakop sa national highway sa Barangay Poblacion 1, Carcar niadtong Huwebes, Oktubre 14, alas 8:00 sa buntag.
Si Toñacao, nahinabi sa Superbalita Cebu, nagkanayon nga gihangop niya ang kaso ug gibarugan niya ang pagsikop sa drayber ug pagpasaka og reklamo nga disobedience ngadto sa awtoridad.
Mao kini hinungdan nga si John Louie Tampos, 27, taga Barangay Patupat, lungsod sa Barili, drayber sa PJA Construction, natanggong sa presinto sa kapulisan sud sa usa ka gabii ug gibuhian pagkaugma human nakabutang og piyansa nga P3,000.
Apan si Tampos nipa-blotter usab sa hitabo sa pagka Dominggo, Oktubre 17, ug nagkanayon nga mopasaka og reklamo sa Ombudsman.
Gihimakak niya nga nisulti og "buang" ngadto sa pulis.
Dugang niya, ang mga sakay sa trak sa kompaniya nga iyang gimaneho niadtong higayona mao ang mga kaubang trabahante sa PJA Construction ug saksi sa nahitabo.
Pag-abot sa kurbardang dan, nihunong siya aron motubag sa sugo sa lawas.
Apan ang nagsunod niya ang usa ka Toyota Avanza nga nagsige og serbato hinungdan nga wala siya madayon sa pagpangihi ug iyang gisingitan og “Hoy! “
Nasuko ang nagmaneho nga Avanza ug nikanaug. Gipangayo ang iyang lisensiya apan wala dayon niya mahatag human wala magtuo nga pulis kini .
Niabot ang patrol car ug gida siya sa police station. (GPL)