NAPALIG-ON ni Calvin Abueva ang iyang poruhan alang sa inilugay sa Best Player of the Conference award human sa semi-finals series sa Philippine Basketball Association (PBA) 2021 Philippine Cup sa Bacolor, Pampanga.
Ang pambatong forward sa Magnolia Ang Pambansang Manok Hotshots nakatigom og 34.2 statistical points human nakasulod sa finals ang Hotshots pinaagi sa pagtagak sa Meralco Bolts, 4-2, sa ilang semi-finals series.
Sa 19 ka mga duwa sa unang season ni Abueva sa Magnolia, nakatali siya og double-double average nga 15.2 puntos ug 10.0 rebounds. Aduna sab siya’y averages nga 2.8 assists, 1.0 steals, ug 1.1 block shots.
Ang laing sakop sa Hotshots nga si Ian Sangalang maoy sikit nga karibal sa gitawag og The Beast, kinsa nagtinguha sa iyang ikaduhang BPC award gikan niadtong 2016 Commissioner’s Cup.
Si Sangalang, kinsa maoy pambatong sentro sa Hotshots, naa sa ikatulong dapit pinaagi sa iyang 33.0 SPs.
Ang pambato sa NorthPort Batang Pier nga si Robert Bolick maoy naa sa ikaduhang dapit dala ang 33.7 SPs apan wala na kini poruhan nga makagukod kay nanamilit na man ang Batang Pier sa quarter-finals.
Si Sangalang nipakita’g walay paglubad nga duwa alang sa Hotshots diin nag-average siya og 16.7 puntos, 8.8 rebounds, ug 1.4 assists.
Ang Fil-Am rookie sa Talk N’ Text (TNT) Tropang Giga nga si Mikey Williams nahiluna sa ikaupat nga dapit pinaagi sa iyang 32.0 SPs.
Si Williams adunay averages nga 16.2 puntos, 4.7 rebounds, ug 4.4 assists. Tungod kay nakasulod man sa finals ang TNT, aduna pa'y poruhan si Williams nga makagukod ni Abueva.
Ang pambatong sentro sa San Miguel Beermen nga si JuneMar Fajardo maoy mikompleto sa top 5 pinaagi sa iyang 31.8 SPs. (ESL)