CRIME volume sa Siyudad sa Sugbo sa miaging semana nikunhod og 47 porsiyento itandi sa mga semana sa miaging buwan tungod sa abag sa mga barangay tanod sa kapulisan.
Matag semana, ang kapulisan sa dakbayan maka tala og kapin sa 20 ka mga krimen sama sa murder, homicide, physical injuries, rape, robbery, theft ug carnapping sa motorsiklo ug mga sakyanan.
Ang mga krimen ilang gitawag og 8 focus crimes.
Apan sa milabayng semana, nakatala lang silag 12 sa 8 focus crimes, 10 niini theft nga pulos nasulbad usab samtang ang duha robberies ug murder nga gitakda usab nga pasakaan og kaso ang mga suspek.
Matod ni Police Lieutenant Colonel Wilbert Parilla, deputy city director for operations sa CCPO, nga ang usa sa mga hinungdan niini tungod sa pag abag sa barangay peace security officers sa matag barangay nga sakop sa usa ka police station.
Pasabot ni Parilla nga ang Kagamhanan sa Siyudad sa Sugbo miluwat og kamandoan sa mga barangay tanod sa pag-abag sa kapulisan sa pagpatunhay sa kalinaw ug kahusay sa ilang lugar.
Di sila mahatagan sa ilang honorarium kon walay pirma sa hepe sa usa ka police station nga magmatuod nga mi duty sila.
Kaniadto, walay mouban nga mga barangay tanod panahon sa ilang pagpatrolya apan karon mo apil na sila sa pagsuroy sa mga sudlonong bahin sa kabarangayan adlaw ug gabii.
Matod ni Parilla nga epektibo ang pag abag sa mga barangay tanod sanglit sila ang nasayod asa kining mga dapit nga adunay mga badlongon sa ilang dapit nga maoy kanunay susihon sa kapulisan.
“Before man gud, dili kaayo ang tanang BPSO mokuyog sa police. But as of now, kon unsa ang naka detail, tagaan man sa mga barangay ang atoang stations. Dapat ang BPSO mo report sa atoang mga stations para to render duty,” matod ni Parilla.
Matag adlaw sub-sub ang ilang pagpakatap sa mga pulis ug mga barangay tanod nunot sa nagkaduol na ang Pasko ug gituohan nga ang mga kriminal mosakay usab sa panahon. (AYB)