GIMANDO ni Cebu City Acting Mayor Michael Rama ang temporaryong pagpahunong sa clinical trial sa WestVac Biopharma Co. Ltd. labot sa ilang bakuna batok sa coronavirus disease (Covid)-19.
Kini human wala mananghid sa Cebu City Government ang nagdumala sa clinical trial nga giingong anaa sa usa ka pribadong hospital sa dakbayan sa Sugbo.
“As far as the City Government (is concerned), we don’t recognize it..being the acting mayor, in-charge especially on matter about health per Local Government Code, that should not be pursued. I am officially telling whoever they are, they should stop,” paghulagway ni Rama.
Ang acting mayor niingon nga bisan kon adunay approval sa Department of Science and Technology (DOST) ang pagpahigayon nila sa pagtuon dinhi sa Pilipinas para sa ilang himuon nga bakuna, kinahanglan sila nga mo-coordinate sama sa gibuhat kaniadto sa dengue vaccine.
“If they would wish to be into that, I find it really abominable, highly reprehensible . That is already taking things abrasively. Naa raman ta ang opisina sa mayor, vice mayor, sa council, wa man ni mangawala, “ dugang sa acting mayor.
Si Rama niingon nga kinahanglan nga adunay memorandum of agreement (MOA) nga aprubado sa City Council uban sa nagpasiugda sa clinical trial aron mapahibawo ug nakaandam ang katawhan sa ilang pagahimuon.
Ang Cebu City Police Office gitahasan usab ni Rama sa paghimo og pakisusi sa giingong pagbayad og salapi sa nagdumala sa clinical trial ngadto sa mga tawo mga mosalmot sa ilang gipahigayon nga pagtuon.
Si Dr. Jeffrey Ibones, pangulo sa City Health Department, nagkanayon nga dili supak ang City Government kansang ideya giuyonan ni Rama apan ang ilang gipangayo mao ang koordinasyon.
Atol sa press conference kagahapon, gitug-an ni Rama nga didto nalang siya sa newspaper ug radyo nahibawo nga aduna diay clinical trial sa bakuna sa Covid-19 ang gipahigayon dinhi sa dakbayan.
Si Konsehal Dave Tumulak maoy unang nibisto niini pinaagi sa privilege speech sa Konseho sa miaging semana human niduol kaniya ang usa ka tawo nga nabakunahan niadtong Oktubre 9 nga nagtuo nga kadto final nga bakuna apan ubos pa diay sa clinical trial.