SPECIAL Investigation Task Group (SITG) mokiha na sa riding in tandem nga mi ambush patay kang Richard Buscaino kon mabalik na sa Sugbo ang pamilya nga toa pa sa kaulohan.
Kini human dunay duha ka mga saksi nga positibong miila sa gunman nga nipusil kang Buscaino ug mipirma na sa iyang affidavit ang usa kanila.
Si Buscaino gi ambush sa riding in tandem niadtong Oktubre 8, 2021 sa hapon sa dalan Tres de Abril, Barangay Labangon, Siyudad sa Sugbo.
Matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO), nga aduna na silay ngalan sa gunman apan dili lang una nila ikabutyag samtang wa pa mapasakai og kaso sa korte.
“Hopefully maka file na tag kaso karon nga naka schedule na ang atong witness mopirma na sa iyang affidavit. Hopefully kon makompleto na, it can be filed,” matod ni Parilla.
Giila sa duha ka mga saksi ang gunman human nakita ang panagway sa dihang gipusil si Buscaino.
Gihulagway ni Parilla nga aduna nay record sa pagpamusil ang suspek ug notadong gun-for-hire sa Metro Cebu.
Nag-atubang na, matod pa, kinig kasong murder human siya usab gitumbok nga responsabli sa laing mga kaso sa pagpamusil.
“Duna na sad ni siyay record. We’re able to identify him. Nakakuha ta sa iyang identity because na filan sad ni siyag kaso,” dugang ni Parilla.
Nakapalig-on sa ilang ebedensya ang kuha sa CCTV camera sa dapit nga mitakdo usab sa pamahayag sa duha ka mga saksi.
Giwagtang na nila sa listahan sa motibo ang bangi sa fraternity sa Sugbo ug politika.
Nakatutok na sila karon sa personal nga anggulo.
Wala lang una modetalye si Parilla samtang wala pa nila hingpit nga mapasaka ang kaso sa korte.
Sa pangutana kon kinsa ang mastermind, matod ni Parilla nga ila kining masayran kon madakpan na ang gunman ug ang iyang driver sa getaway vehicle niini.
Unang nakakuha ang mga pulis og CCTV footage nga nagpakita nga mga 10 minutos nga naghuwat ang duha ka killers kang Buscaino, kinsa gikan pa sa iyang punerarya.
Namatay si Buscaino sa upat ka mga samad, duha niini naa sa dughan.