NAGSIGE man tuod og saka ang gidaghanon sa mga nataptan sa coronavirus disease (Covid-19) sa Dakbayan sa Sugbo, apan ning nangaging mga adlaw, nanaghan og maayo ang recoveries kun laboratory negative.
Mao kini sila ang mga pasyenteng asymptomatic nga naa gipapuyo sa mga barangay isolation center (BIC). Niabot na sa kapin 700 ang nangaulian bisan tuod kon nitabok na sa 2,000 ang mga tawo nga nangataptan sa kagaw. Bisan tuod kon kasagaran asymptomatic, di gihapon angay nga molugak ang kagamhanan ug publiko. Dugay pa kining away.
Apan, kinahanglan nga mobalik na sa normal ang kinabuhi sa katawhan, labina sa patigayon nga maoy nahimong gisaligan sa minilyon ka mga pamilya, labina sa ordinaryong mga tawo.
Mas makalilisang ang epekto sa Covid sa ekonomiya kay sa sakit mismo. Binilyon ka pesos ang kadaut sa ekonomiya tungod sa quarantine. Daghang mga negusyo ang nanira, temporaryo o permanente.
Minilyon usab ka mga trabaho ang naapekthan samtang nagdugo ang mga patigayon.
Kon mobalik man sa normal ang tanan, di angay mokompyansa. Ang responsibilidad naa sa tagsa-tagsa kanato, wa lang sa kagamhanan. Simple ra ang buhaton aron ang matag usa kanato makatampo sa pagbatok sa Covid nga di na kini mokatap pa og maayo. Kinahanglan motuman sa mga protocol, sama sa social distancing ug pagsul-ob og maskara. Kanunayon ang pagpanghunaw.
Kon masakit, sama sa hilanat, ubo ug sip-on, di kini isipon nga ordinaryong balatian. Motaho gilayon sa labing duol nga buhatan sa kagamhanan nga mao ang barangay hall. Mopailawom gilayon sa Covid test aron matino kon di ba novel coronavirus ang nakaingon niini.
Ginagmay ra tuod kini nga buhat. Apan kon ingon niini ang mentalidad sa katawhan, way Covid nga mabuhi sa katilingban nga nagmatngon ug nagmabinantayon.