SECTIONS
Superbalita Cebu
Thursday, December 02, 2021
SUPERBALITA CEBU

Editoryal: Responsibilidad

Editorial art by Ariel Itumay

USA ka bahin sa Kinalumsan River napalapdan human ang usa ka tindahan og contruction materials boluntaryong niguba sa tipik sa ilang edipisyo hinungdan nga nabalik ang 6 metros nga gilapdon sa sapa.

Matod ni Konsehal Jerry Guardo nga maoy gitahasan niini isip chairman sa committee on infrastructure sa Konseho sa Dakbayan sa Sugbo, duna pay laing estruktura nga ilang isunod sa pagguba. Kalapasan kini sa three-meter easement, kanang way estruktura nga tukuron mga tres metros gikan sa sapa.

Gitumong kini aron way makasampong sa tubig nga maoy makaingon sa pagsuyla sa baha matag bunok sa uwan kay nasampungan ang natural nga agianan. Suma gud, pila man ka mga baha ang nangahitabo tungod kay barado ang naandan nga agianan sa tubig? Bisan gani basura, kon makababag, mosuyla sa kabalayan ang baha gikan sa mga sapa ug estero nga nasampungan.

Di baya ni mahitabo kon ang mga opisyal sa kagamhanan, gikan sa barangay ngadto na sa mga opisyal sa local government unit (LGU) nagbuhat sa ilang mga tahas, kanang pagbantay sa gitukod nga mga estruktura nga way nalapas sa balaud.

Sa kagamay sa ilang teritoryo, nakabantay unta ang mga barangay official sa paglapas sa nagtukod og edipisyo. Sila ang nag-una sa hut-ong sa kagamhanan nga mopatuman unsay nalatid sa balaud. Ila ang unang kaakuhan.

Kon di nila kaya ang pagpatuman sa balaud, mahimo silang magpahibawo sa City Hall aron maaksyunan ang problema. Di sila manghunaw ug molikay sa ilang responsibilidad kay sa mga buluhisan duna baya silay bahin.

Di sila makapanghunaw sa kaakuhan kon dunay mga katalagman nga moigo nga mokalas og kinabuhi ug modaut og mga kabtangan kon ang hinungdan naa sa ilang tugkaran. Kon nagbuhat pa sila sa ilang trabaho, mas mogaan ang trabaho sa LGU, apan dunay uban naanad sa pagpiyong.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!