Lalake mikatkat sa poste sa Cebeco 2 sa Danao City

WAY bisan usa ka lumolupyo sa duha ka mga dapit sa Dakbayan sa Danao nga nakaila sa lalakeng mikatkat sa poste sa kuryente sa ala 1:30 sa hapon, Martes, Oktubre 19, 2021 sa Barangay Looc, Dakbayan sa Danao.

Matod ni Police Lieutenant Colonel Ardiolito Cabagnot, hepe sa Danao City Police Station, nga ang lalakeng nagpailang si Willy Boy Duaban, 36, minyo, wa mailhi sa mga tawo sa duha ka mga dapit nga ilang gidad-an human niya nganli nga iyang gigikanan.

Iyang gitumbok nga naa siya magpuyo sa Taboc, Looc ug natawo sa bukirang barangay sa Lawaan, Dakbayan sa Danao.

Apan dihang ilang gidala sa duha ka mga dapit, way bisan usa ka tawo nga nakaila kaniya.

Si Duaban naabtan sa mga pulis nga naglingkod sa tumoy sa poste nga iyang gikatkatan.

"Natinga mi kay gatapok ang mga tawo, diin paghangad namo, nakita namo nga didto ra siya galingkod sa tumoy sa poste.Ato siyang gihangyo pagkanaug," asoy ni Cabagnot.

Ila kining gihatagan og tubig kay nangayo.

Naatol usab nga dunay niagi nga boomtruck kansang mga sakay ilang gihangyo nga motabang aron makakanaug si Duaban.

Malampuson nilang na-rescue si Duaban.

Nagtuo si Cabagnot nga dunay depression si Duaban kay "dili kaayo maestorya og tarong, maorag nalipasan og gutom."

Apan matod ni Cabagnot nga human makapahuway ug nakakaon, arang-arang na nga motubag si Duaban.

Iyang giawhag ang mga kabanay niini sa pagduaw sa police station kay naa kini sa ilang buhatan gi-safekeep. (GPL)