MGA produkto sa Cebu Schools Athletic Foundation, Inc. (Cesafi) ang molangkob sa ARQ Builders nga maoy mo-represent sa unang Chooks-to-Go Pilipinas 3x3 Invitational nga ipahigayon sa Miyerkules, Oktubre 20, 2021 sa Laus Event Center sa San Fernando, Pampanga.
Ang usa ka adlaw nga tournament salmotan sa 12 ka mga teams nga gikan sa nagkalainlaing rehiyon sa nasod nga gibahin ngadto sa upat ka mga brackets.
Si Jerry Guzman, ang assistant coach sa Southwestern University, maoy modala sa ARQ Builders team nga gipanag-iya ni Jason Arquizola.
Ang team gibituonan sa duha ka Cesafi import nga sila si Frederick Elombi sa University of Cebu Webmasters, Landry Sanjo sa SWU Cobras, RJ Dinolan sa University of San Jose Recoletos (USJ-R) Jaguars ug Monbert Arong (SWU).
"For our players just to be back in the game they love , its already big for them. Our players are composed of Cesafi standouts," matod pa ni coach Guzman.
"We just want to show the world that Cebuano players are ready for 3x3 game, and that we can compete in international fiba3x3 sanction games," dugang sa batan-ong coach.
Inabagan sa FTW Athletics nga iya ni Bertoni Salazar, ang ARQ nga nahitapo sa Pool B mosakbang sa Quezon City sa alas 2:40 ang takna sa hapon.
Magsagubang og malisod nga tahas ang ARQ Builders team sanglit mga inila ug beterano usab sa basketball ang ilang makontra.
Pipila ka mga Sugboanon ang manuwa usab sa laing team nga nagrepresentar sa laing lugar.
Kini sama nila ni kanhi PBA player ug Cesafi back-to-back MVP Mark Jayven Tallo, Zachary Huang, Chico Lanete uban sa import nga si Harry Nzeusseu Diountcheu nga maoy molangkob sa Heihei Manila squad.
Ang ubang participating squad mao ang Pacquiao Coffee Bacolod, BRT Sumisip Basilan, Homegrown Grains Bocaue, Amacor Mandaluyong, RBR Cabiao Nueva Ecija, Pasig Kingpins, Adam Esli Pasay, MNL Kingpin Quezon City, Essen Immunoboost Sarangani ug Zamboanga Valientes.
Ubos sa format nga ilang gisunod, ang top two sa matag brackets maoy masulod sa quarterfinals round diin didto hashasan usab ang moqualify alang sa semifinals aron pagdeterminar sa duha ka finalists. (JBM)