DAVAO DE ORO -- Dako ang pagtuo sa katawhan nga dunay grupo sa kulto nga naglihok sa lungsod sa Maragusan human nabaniog ug na-post sa Facebook ang mga pantiyon sa sementeryo nga gipangbangagan.
Miani og nagkadaiyang komentaryo ang maong post kung diin kadaghanan nagtuo nga kini hinimoan sa grupo o mga tawo nga gusto makabaton og anting-anting sama sa giingong grupo sa kulto.
Usa sa mga molupyo sa lungsod ang broadcast journalist nga si Sarx Lanos nga nahinabi sa Sunstar Superbalita pinaagi sa selpon nagbutyag nga ang insidente unang nahitabo ning tuiga, bulan sa Marso, sa sementeryo sa Barangay Tigbao kung diin tulo ka mga pantiyon ang gipangbangagan ug ang mga minatay sulod sa pantiyon gipangkuhaan og tuway-tuway.
Matud pa nga way aksiyon nga gihimo ang barangay sanglit way tagtungod nga mireklamo ug wa say nakakita kung si kinsa ang mihimo niini.
"Wa may gihimo ang barangay Bro kay wa man pod nakakita kung kinsa ang mibangag sa mga pantiyon, hangtud nga nahilom ang balita kay way hingtungdan nga mireklamo," saysay ni Lanos.
Apan sumala ni Lanos nga niadtong miaging semana, naglubong sila sa namatay nilang kabanay sa nahisgutang sementeryo apan wa sila nabalaka nga lungkabon ang pantiyon niini sanglit dako ang ilang pagtuo nga ang puntirya sa mga suspek kadtong mga minatay nga dugay nang nalubong ug dili ang mga bag-ong gilubong.
Laing molupyo ang nahinabi ning tigsuwat nga wa magpabutyag sa iyang pangalan, nagsaysay nga mga tawo nga nagbaton og black magic ang nagbuhat sa ingon. Gihimo ang tuway-tuway sa minatay nga anting-anting aron mahimong invisible kun di makit-an sa higayon nga buot nila nga di magpakita.
Matud pa nga gihimo ang pagkuha sa tuway-tuway sa minatay sa panahon nga takdol ang bulan sanglit mao kini ang higayon nga kusog ang puwersa sa mga sakop sa kulto.
Siya nasayud sa maong buhat sanglit ang iyang apohan kaniadto adunay kasinatian sa nahisgutang kalihukan.
Ang mayor sa lungsod sa Maragusan nga si Ate Maris Colina gipaningkamutan nga mahinabi aron madungog ang iyang bahin bahin sa insidente apan sa pagtawag ning tigsuwat nagpunay lang og bagting ang iyang selpon ug way mitubag. (Dexter T. Visitacion)