KIDAPAWAN CITY -- Nawad-an og sugang dagitabnon ang tibuok barangay sa Pigcawayan, North Cotabato human nga gikatkat sa bitin ang linya sa kuryente alas 9:00 sa gabii niadtong Lunes, Oktubre 18.
Matud ni Engineer Felix Canja, general manager sa Cotabato Electric Cooperative (Cotelco), nga nakadawat sila og tawag nga napawong og kalit ang suplay sa kuryente sa Barangay Kimarayag sa maong lungsod.
Daling gisusi sa mga electric linemen sa Cotelco kung unsa ang hinungdan sa kalit nga brownout sa maong barangay.
Apan naglisud sa pagpangita ang mga linemen sa Cotelco sa hinungdan sa brownout.
Subling nakadawat og tawag ang buhatan sa Cotelco gikan sa mga molupyo sa Barangay Kimarayag sa nagkalayo nga linya sa kuryente.
Didto nadiskubre sa mga linemen nga usa ka dakong bitin ang nagbitay sa wire o primary line nga misubay sa dakong punoan sa kahoy nga maoy hinungdan sa pagkapawong sa suplay sa kuryente.
Gikuha sa mga linemen ang bitin nga patay na gikan sa linya sa kuryente hinungdan nga nabalik gilayon ang sugang dagitabnon sa maong barangay.
Nasayran nga di lang kini maoy unang higayon nga dunay mikatkat sa linya sa kuryente sa Cotelco kay sa miaging mga higayon nakasinati sab sila og sama niini nga insidente.