DUHA dayon ka gikaintapang mga engkuwentro ang masaksihan sa pagsugod sa National Basketball Association (PBA) 2021-22 season karong adlawa, Oktubre 20, 2021 (RP time).
Ang defending champions Milwaukee Bucks makigharong sa ilang karibal sa Eastern Conference nga mao ang Brooklyn Nets karong alas 7:30 sa buntag samtang ang Golden State Warriors moasdang sa Los Angeles Lakers karong alas 10:00 sa buntag.
Lima ka mga buwan ang nakalabay, nakaipsot ang Bucks sa pagpanghulga sa Nets sa deciding Game 7 sa ilang conference semi-finals series nga grabe ka kulbahinam.
Ang Bucks wa kaayo’y giusab sa ilang puwersa ug padayon silang mosandig og maayo sa trayanggulo nila ni Giannis Antetokounmpo, Khris Middleton ug Jrue Holiday.
Gipasabot ni Antetokounmpo nga wala pa siya makuntento ug gusto pa siyang makatilaw og laing titulo.
“I’m not satisfied,” asoy ni Antetokounmpo. “I’m not even close to being satisfied. That’s the tone we’ve got to set as a team. And as a leader of this team, that’s the tone that I’m going to set. We understand that teams are coming for us, but we’re going to be ready.”
Si Antetokounmpo, kinsa nag-average og 35.2 puntos ug 13.2 rebound sa NBA Finals kontra sa Phoenix Suns, mipabuhagay nga padayon pa siyang maningkamot aron mas mabaid ang iyang abilidad.
“We continue to say we feel like Giannis has got a lot of room for improvement, which is a lot of respect for how much he already does and how great a player and how impactful he is to winning,” batbat ni Milwaukee coach Mike Budenholzer.
Sa ilang bahin, ang Nets adunay tapakanan nga haw-ang gumikan kay wala ang ilang pambatong pointguard nga si Kyrie Irving, kinsa ilahang gidid-an nga makaduwa hangtod nga dili kini magpabakuna batok sa Covod-19.
Hinuon bisan wala si Irving, ang Nets usa gihapon sa gikonsiderar nga sayong inilog sa pagpangulo nila ni Kevin Durant ug James Harden.
Sa laing parisan, ang Lakers naghinamhinam nang mokombati hilabi na kay nakakuha sila og dugang mga haligi aron makatabang nila ni 4-time MVP Lebron James ug Anthony Davis.
Sa off-season, nakuha sa Lakers sila si Russell Westbrook ug Carmelo Anthony unya nabira sab nila’g balik ang mga beteranong sila si Dwight Howard ug Rajon Rondo.
Ang Warriors, sama sa naandan, magsalig lang gihapon og maayo kang 2-time MVP Stephen Curry aron mogiya sa ilang batan-ong puwersa.
Hapit na sab makabalik og duwa gikan sa pagkaangol ang usa sa mga haligi sa Warriors nga si Klay Thompson.(ESL, AP)