Dear Atty. Joan,
Maayong adlaw Atty. Joan. Ako diay si Lorna, real estate agent. Sa trabaho akong nailhan ang akong kapuyo nga si Jose. Napulo ka tuig ang among age gap.
Naibog ko niya kay responsable ug masinabtanon si Jose. Duha ka tuig na kami nga nag-ipon sa usa ka panimalay diri sa Cebu City. Maayo ra ang among pagpuyo.
Wala miy mga anak apan ang akong isugilon kanimo kabahin sa personal nga kinabuhi sa akong uyab.
Si Jose duna nay duha ka anak nga mga batang lalake sa iyang unang kapuyo kaniadto.
Gatungha na ang mga bata. Duna poy trabaho ang ilang inahan nga usa ka supervisor sa call center company, mao nga sa dugay na nga panahon, wala ra kini magsamoksamok sa akong uyab.
Apan bag-uhay lang ko nga giingnan ni Jose nga midemanda karon og suporta ang iyang kanhing kapuyo ug ganahan kini nga mahatag kaniya sa labing dali nga panahon.
Matod pa sa inahan sa mga bata, kinahanglan mahatagan sila og suporta nga nagkantidad og P15,000 matag buwan human nga gipaeskwela niya ang mga bata sa pribadong eskwelahan.
Gipasabot sa inahan ngadto sa akong pares nga makatabang ang pag-eskwela sa private school kay lisod ang pagkat-on kuno sa public school karong pandemiya.
Sa tinuod lang, nakasabot pod ko sa punto sa inahan kay madungog man nako sa mga balita ang mga kalisdanan sa mga estudyante sa pag-eskwela sukad nagsugod ang Covid-19 pandemic.
Apan dili pod unlimited ang kwarta sa akong kapuyo. Duna kamiy gipatukod karon nga panimalay ug plano pod kami nga magsugod og kaugalingong pamilya. Nagsuporta pod si Jose sa iyang pamilya didto sa Leyte.
Tungod kay kamo man ang nailhang organisasyon sa pagsulbad og mga suliran kabahin sa mga bata, duna koy pipila ka mga pangutana: (1) Mapugos ba si Jose nga mohatag og suporta sa iyang mga bata?, (2) Makabuot ba ang inahan sa kantidad nga ihatag ni Jose kanila?, ug (3) Mahimo ba nga mapriso si Jose kon dili kini mohatag og suporta?
Hinaot nga matubag nimo ang akong mga pangutana. Salamat ug padayon kamo!
Imong magtatampo,
Lorna
Dear Lorna,
Una sa tanan maayong adlaw usab kanimo. Salamat sa imong pagsunod niining lindog.
Katungod sa mga bata nga mahatagan og suportang pinansyal sa ilang mga ginikanan subay sa Family Code sa Pilipinas.
Naglangkob sa maong suporta ang paghatag og kapuy-anan, sanina, pagpatambal, transportasyon, edukasyon ug mga butang nga kinahanglan sa pagsustenar sa kinabuhi sa mga bata.
Mao nga maglisod og balibad ang imong uyab sa paghatag og suporta ngadto sa iyang anak labaw na nga ang kantidad nga gipangayo nila alang sa pagpaeskwela sa mga bata.
Angay hinuon hinumduman nga ang kantidad sa suporta mag-agad sa ‘financial capacity’ sa mga tawo nga gimanduan nga mohatag og suporta sama sa mga ginikanan ngadto sa ilang anak.
Kon mapamatud-an ni Jose nga dili niya kaya nga mahatag ang gipangayong kantidad tungod kay dili igo ang iyang kita, mahimo siya nga mobalibad sa maong kantidad. Mahimo siya nga musugyot nga pagamyan ang gipangayong suporta nila.
Mahimo sab nga silotan si Jose kon wala kiniy igong hinungdan sa pagbalibad sa paghatag og suporta. Makonsiderar kini isip ‘economic abuse’ ubos sa Anti-Violence Against Women and Their Children tungod kay gihikawan niya og katungod ang iyang mga anak ug inahan nila nga mahatagan og saktong suportang pinansyal.
Alang sa kaayuhan sa mga bata, nanghinaot ako nga masabutan nilang Jose ug inahan sa mga bata ang binulang suporta isip paglikay nga maabot ang maong isyu ngadto sa husgado o mga awtoridad.
Daghang salamat Lorna sa imong sulat tampo. Hinaot nakahupay ang maong tambag sa naghuot mo nga galamhan.
Imong alagad,
Atty. Joan