NAKADUNGOG na seguro kamo sa yangongo sa mga security guard o sikyu. Dili tungod sa trabaho apan, ang pagpahimulos sa ilang agency. Pwera sa pipila nga maayo. Apan dunay dagkong agency nga nagbase pa sa kaulohan ang nagpahimulos sa ilang guwardiya nga nadestino dinhi. Nagkupot pa sa seguridad sa mga dakong kompaniya ug malls sa Sugbo.
Samtang, ang komon nga reklamo naglakip sa gamay nga suweldo apan taas nga duty ug risgo pa ang pwesto, kida sa suweldo sa Social Security System (SSS) wala gisumiter, way saktong benepisyo o bonus ug labaw sa tanan, dili ma-regular sa trabaho bisan dugay na sa puwesto.
Ning ulahi, dunay yawyaw sa sikyu sa dakong kompaniya nga nagbase sa kaulohan. Dakong kantidad nga nakuha sa ilang suweldo nga giingong ‘charge’ sa bakuna? Gibutang nga ‘others’ sa payslip. Dili ba libre kini sa kagamhanan? Tinuod o dili kini nga alegasyon sa sikyu apan, angay masusi sa hingtungdang ahensiya sa kagamhanan.
Ang kabus nga sikyu walay igong gahom. Mahadlok mawad-an og trabaho. Sayon patiran sa pwesto human way seguridad sa panarbaho. Sa laktod, dili regular.
Dinhi untang bahin masulod ang tabang sa ahensiya sa kagamhanan. Apan mura man og natulog sa kadugay sa panahon. Tungod ba kaha nga gawas nga adunahan, sagad sa nanag-iya og agencies retired nga sakop sa Philippine National Police (PNP).
Subay sa 2003 Revised Rules and Regulations Implementing R.A. 5487 nga giamendar, ang PNP Security Agency Guards/ Supervision Division (PNPSAG/SD) ug PNP Firearm and Explosives/ Security Agency Guard Services (PNP FE/SAGS) ang moaprobar ug mosusi sa security agencies.
Apan pabor lang ba kaha sila sa tagdumala, dili manginlabot sa makaluluoy nga sikyu?