MAKABALIK na og tinda sa sidewalk ang mga vendor sa Cebu City kada adlaw apan kinahanglan nga sila fully vaccinated batok sa coronavirus disease (Covid)-19 sugod karong adlawa Oktubre 20, 2021.
Kini human giaprobahan ni acting Mayor Michael Rama ang resolution number 004 sa board sa Garbo Asenso Sumbayan Alyansa (GASA) nga giduso nilang City Councilors Phillip Zafra, Junjun Osmeña ug Maria Pino, kinsa maoy leader sa CCUVA.
Si Raquel Bohol-Arce, pangulo sa Prevention, Restoration, Order, Beautification and Enhancement (Probe) nibanabana nga adunay dul-an 500 ka mga sidewalk vendors ang fully vaccinated nga nagbase sa Colon, Osmeña Boulevard,uptown ug midtown area ug North Reclamation Area.
“Sugod ugma (karon), ang tanan nga mga vaccinated sidewalk vendors makatinda na pagbalik seven-days a week,” matod ni Arce.
Sila ang kasamtangang nagtinda upat ka adlaw kada semana sugod niadtong niluagluag ang quarantine classification sa Cebu City.
Ang vendors makatinda gikan alas 9 sa buntag hangtod alas 7 sa gabii matag adlaw sa maong mga dapit apan gikinahanglan nga ang ilang nahimutangan adunay nag-uwang nga poste aron masiguro nga dili sila makabalda sa mga pedestrian.
Si Arce, kinsa maoy tigpatuman sa kahapsay ug kaangayan sa mga sidewalk sa Cebu City, niingon nga aprubado na sa buhatan ni Atty. Ian Kenneth Lucero sa City Department of the Interior and Local Government labot sa aksyon sa City Government alang sa sidewalk vendors./