SA Martes, Oktubre 19, 2021, nipatuman na sab og laing umento sa presyo sa lana ang mga oil company sa nasod.
Walo na ka sunodsunod nga mga semana nga nagsige og saka ang presyo sa lana matag litro.
Tulo na ka sunodsunod nga mga semana nga ang umento sa presyo misaylo og P1 matag litro.
Ang mga oil company nipaumento og P1.50 matag litro sa diesel samtang P1.80 matag litro sa gasolina sugod sa Martes sa buntag.
Giumentuhan usab nila ang presyo sa kerosene og P1.30 matag litro.
Ang Pilipinas Shell, PTT Philippines, Total, Seaoil, Petron ug uban pa nipahibawo sa ilang price increase sa Lunes pinaagi sa social media.
Sa nakalabay nga tulo ka mga semana, moabot na sa kinatibuk-an og P8.65 matag litro ang umento sa diesel, P7.20 matag litro usab sa gasolina.
Matod sa weekly monitoring sa Department of Energy (DOE), sukad sa sayo ning tuiga, niabot na og P16.50 ang umento sa presyo matag litro sa diesel, P17.85 matag litro sa gasolina ug P14.19 matag litro sa kerosene.
NAGKUWANG
Sa ilang press release, matod sa DOE nga ubos pa itandi sa panginahanglan ang oil production karong panahuna sa tibuok kalibutan itandi sa panginahanglan.
Ang panginahanglan sa lana matag adlaw miabot na og 103.22 milyunes ka barel matag adlaw, apan ang supply karon miabot lang og 100.32 milyunes ka baril matag adlaw kun kuwang nga 2.9 milyunes ka barel matag adlaw.
Nihatag og mga hinungdan ang DOE.
Una, mao ang anam-anam nang pagbalik sa ekonomikanhong mga kalihukan human mapugngi ang pagkatap sa Covid-19, diin ang Europe nagpatuman og “no-lockdown policy” ug pagpakusog sa China sa iyang ekonomiya.
Ikaduha, duna say mga nasod nga nag stock og produktong petrolyo samtang nag-angat ang winter.
Ikatulo, ang pagpaminos sa produkyon tungod sa pagbalhin na sa pagkuhag enerhiya gikan sa low-carbon emitting sources.
“This has limited the optimum level of production, causing the halt and event withdrawal of investments in the development and expansion of the fossil fuel industry,” matod sa DOE.
Laing hinungdan mao ang ekonomikanhong silot sa mga nasod sa Iran ug Venezuela nga nagpahunong sa pagkawot og oil ug pagpalit sa ilang mga lana.
Hinuon, matod sa DOE, ang Organization of Petroleum Exporting Countries (OPEC) nisaad nga ilang umentuhan ang ilang produksyon og 400,000 ka barel matag adlaw.
DISKWENTO
Ang DOE nakigtagbo sa oil industry stakeholders aron di maayo maapektuhan ang public transport sector sa umento.
Pipila ka mga kompaniya sa lana, sama sa Jetti, Seaoil, Shell, Phoenix ug Unioil nagkasabot nga mohatag og diskwento sa public transport sector, gawas sa ilang paghatag og mga diskwento sa mga bakunado ug loyalty incentives.
Gawas niini, giawhag usab sa DOE ang Ubos Balay Balauranan sa pag-review sa Oil Deregulation Law.(REV)