ANG mga mayor sa lalawigan sa Sugbo maoy pabut-on sa mga lagda nga ipatuman atol sa pag-obserbar sa Kalag Kalag.
Kini maoy pahibawo ni Cebu Governor Gwendolyn Garcia, nga ang matag local chief executive sa dakbayan ug munisipalidad gihatagan og katungod sa pagpatuman og lagda atol sa Nobiyembre 1 - 2 nga kalihokan sanglit sila maoy mas nahibawo sa kahimtang sa ilang lugar.
“So, I will leave it to the judgement and wisdom of our LCEs. Our mayors will determine what proper measures or protocols to be followed...,” matod pa ni Garcia.
Sa susamang kalambuan, mga ginikanan nga magdalag bata sa ilang pagduaw sa sam-ang ang gidid-an nga makasulod.
Kini maoy pahibawo ni P/Lt. Col. Wilbert Parilla, deputy city director for operation sa Cebu City Police Office human nga nabantayan nga adunay mga menor de edad nga nakasulod sa mga sam-ang kagahapon, Oktubre 19.
“Ang atoang directives sa atoang mga personnel, usa ka tawo nga moanha magdalag minor dili na gyud siya pasudlon wala tay area para sa minor,” matod pa ni Parilla.
Nasayran nga ang dakbayan sa Sugbo adunay pito ka mga dagkong sam-ang diin gipatuman ang color coding, sa mga mobisita hatagan og colored flaglets.
Sud lang sa 30 minutos ang limitasyon sa ilang pagduaw sa sementeryo (ANV, AYB)