NAGLUMBA-ANAY og panagan tungod sa kalisang ang mga naka-duty nga impounding officer sa Traffic Enforcement Agency of Mandaue (TEAM) sa dihang kalit nga midagan ug mibusina ang dumptruck nga way drayber.

Ang maong ‘killer truck’ maoy nakaligis patay sa nagmotorsiklo nga lalake sa Marcelo Fernan Bridge niadtong Sabado, Oktubre 16, 2021.

Ang maong katingad-an nga pag-andar sa sakyanan nahitabo sa ala 1:00 sa kadlawon, Dominggo, Oktubre 17.

Sumala pa ni Harry Bastian Llesis, impounding officer sa Team, nga nahibulong sila nganong mi-andar ang makina dayon mi-abante og usa ka dupa dungan sa pagsirbato.

Gi-angkon ni Llesis nga ang yawi sa 10-wheeler truck nag-ung ong sa sakyanan, apan dili kini igo aron nga mo-andar, mo-abante ug mosirbato.

Tungod sa maong panghitabo nagkaguliyang og panagan ang mga impounding officer dayon tawag sa ilang pangulo nga mao ray nahibawo sa pag-operate og dagkong trak.

Gipasabot ni Llesis nga sa ilang pag-park sa maong sakyanan adunay distansiya nga usa ka dupa gikan sa laing mga sakyanan nga na-impound, kini aron aduna pay igong lugar sa pag-atras kon aduna nay molukat.

GIKALAG?

Apan tungod kay midagan ang maong ‘killer truck’ nga way nagmaneho, nipidpid na hinuon ang dulong niini sa laing gi-impound nga trak.

Samtang ang laing impounding officer nga si Mark Ivor Cortes misaysay nga dili kini unang higayon nga adunay kahibulongang panghitabo sa ilang impounding area.

Adunay higayon nga may nakakita nga magti-ayon nga nag-akbo sa usa ka motorsiklo nga maoy ilang gisakyan sa ilang pagka disgrasya.

Apan ang pagdagan sa maong trak de karga maoy pinakangilngig sa ubang panghatibo sud sa impounding area, wa pay labot sa mga iro nga kanunayng mo-uwang.

Gipakita sab sa mga kawani nga ang maong truck aduna pay unod ug dugo ni Rudy Amistad, kadtong biktima nga naligsan sa sa maong sakyanan.

PABENDITAHAN

Mihangyo ang executive director Edwin Jumao-as nga pa-blessingan ang tanang mga sakyanan ilabi na niadtong nalambigit sa aksidente kansang biktima namatay./