Tigama og peke nga kwarta nasikop

FAKE DIAY. Gipakita ni Agent Dickenson Gamalo sa payments and currency investigation group sa Bangko Sentral ng Pilipinas (BSP) ang peke nga P1,000 nga nakuha gikan kang Joseph Salas. (Hulagway ni Arnold Y. Bustamante)
FAKE DIAY. Gipakita ni Agent Dickenson Gamalo sa payments and currency investigation group sa Bangko Sentral ng Pilipinas (BSP) ang peke nga P1,000 nga nakuha gikan kang Joseph Salas. (Hulagway ni Arnold Y. Bustamante)

TIGAMA og peke nga kwarta na-entrap sa mga sakop sa Criminal Investigation and Detection Group (CIDG) 7 Mandaue City Field Unit sulod sa iyang balay sa Back Shopwise, Barangay Basak San Nicolas, Siyudad sa Sugbo.

Ang nasikop alas 9:40 sa Martes sa gabii, Oktubre 19, 2021 giila nga si Joseph Mercado Salas, 36, kasamtangan nga nagpuyo sa maong dapit.

Nakuha sa mga operatiba sa CIDG 7 sa sulod sa iyang balay ang 16 ka peke nga tag P1,000 ug 13 ka tag P500 bill nga moabot ang tanan og P24,500.

Matod ni Police Lieutenant Colonel Hector Amancia, deputy regional chief sa CIDG 7, nakadawat silag impormasyon labot sa illegal nga kalihukan ni Salas.

Ila dayon kining gipanid-an aron pagkompirmar sa katinuod.

Human masuta nga tinuod ang impormasyon, nakig-alayon dayon ang CIDG-7 sa Bangko Sentral ng Pilipinas (BSP) alang na sa ilusad nga entrapment operation nga miresulta sa pagkasikop ni Salas.

“Nakuha sa iyang possession ang different currencies amounting toP 24,000. As we have investigated this person, ang iyahang revelation naay nagpabuhat sa iyaha sa counterfeit nga kwarta. For every P10,000, naa siyay bayad nga P10,000,” matod ni Amancia.

Taod-taod na, matod pa, sa pag himog peke nga kwarta si Salas. Sa matag P10,000 nga mahimo niini, bayran siya og P1,000 sulod na sa upat ka bulan.

Dunay gihatag nga ngalan si Salas kon kinsa ang nag-hire kaniya nga maghimo og peke nga kwarta nga mao na usab karon ang target sa follow-up operation aron dili mokatap ang mga fake nga kwarta sa gawas.

Dugang ni Amancia nga ilang gihingusgan ang pag monitor sa manufacturing sa peke nga kwarta nunot sa nagkaduol nang piniliay nga mahimong magamit sa mga kriminal aron ipanghatag sa mga tawo.

“We are doing this as a future deterrence because we don’t want to circulate this fake currencies sa atong merkado. At the same time, it will be used illegally especially during this coming elections,” pasabot ni Amancia.

Giangkon ni Salas nga nakahimo na siyag kapin sa 50 ka tag P1,000 nga peke nga kwarta bugti sa suhol kaniya.

Iyang kaila ang mihangyo nga magpahimo sa wala mahibaw-i nga rason, sigun ni Salas.

“Igo ra sad ko mituman sa sugo, Sir. Misugot ko kay amigo lagi. Ana siya nga karon lang kuno last na mao to, kato nga time ana ko last na gyud ni ha, dili na gyud ko ani kay ako may mabutang sa alanganin ani gud kon magkinaunsa, maytag motabang mo nako,” matod ni Salas.

Siya nibutyag nga nakat-on siya nga moprintag kwarta tungod kay naka trabaho siyag photo shop kaniadto.

Ang BSP, pinaagi kang Agent Dickenson Gamalo sa payments and currency investigation group, nagkanayon nga nakadawat na silag impormasyon sa kaulohan nga adunay mga tighimo og peke nga kwarta sa siyudad sa Sugbo.

Nakig-alayon dayon sila sa CIDG 7 labot niini hinungdan nga milusad dayon ang kapulisan og surveillance.

Dali ra ilhon ang dili tinuod nga kwarta pinaagi sa hulagway niini.

Mailhan usab kini kon mahikap na tungod kay walay special feature.

“Sa look, method naman yung embossed print prints. We also have the water marks and security fibers na very visible. Makikita po natin yun, and then yung see through mark sa bank notes natin, makikita natin yan especially if it’s being viewed against the light,” matod ni Gamalo.

Mabinantayon ang BSP karon ilabi na nga ilang gipanglantawan nga mosiaw ang pagkatap sa peke nga kwarta ning nagsingabot nga eleksyon.

Nag monitor pa ang BSP sa laing mga miyembro sa sindikato nga tighimo sa mga fake money nga nag lihok sa Metro Cebu.

Awhag sa kapulisan ug Bangko Sentral ng Pilipinas sa publiko nga mag mabinantayon kon makadawat og kwarta.

Labing maayo nga susihon dayon aron dili mabiktima sa mga kriminal nga nagpakatap og peke nga kwarta. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph