DAKO gihapon ang paglaum sa mga miyembro sa Sara All Philippines 2022 nga matigayon ang substitution karong Nobyembre 15, 2021 ni Davao City Mayor Sara Duterte alang sa pagka-pangulo sa nasud.
Sumala ni Run Sara Run Para sa Bayan 2022 Convenor Alimodin "Wating" Usman nga padayon ang ilang paglibot sa nasud aron manawagan sa katawhan sa hiniusang suporta ngadto kang Mayor Inday.
Dugang ni Usman nga bisan pa og namulong na si Mayor Sara nga di kini magpapili, wala sila mihunong ug gani mohimo pa sila og nationwide caravan gikan Davao City padung sa Kaulohang Manila sa Nobiyembre 10.
Dako ang pagtuo sa Sara All Philippines 2022 nga si Mayor Sara ang mamahimong presidente sa nasud sa sunod tuig, maong wala sila mihunong sa paglibot aron ipabati sa uban nga si Mayor Sara lamang angayan nga mopadayon sa proyekto nga nasugdan sa iyang amahan nga si Presidente Rodrigo Duterte.
"Naniniwala tayo na si Mayor Sara ang susunod natin na pangulo sa bansa, kaya magkaisa tayong lahat, paghandaan natin ang mga araw sa isang desisyon na ikasasaya sa buong bansa, malapit na ang Nobyembre 15," ingon ni Usman kinsa mao sab ang chairperson sa Duterte for Federalism Movement.
Sama sa Sara All Philippines 2022, daghan sab nga parallel groups ang naglaum nga modesisyon gayod si Mayor Inday pinaagi sa substitution. (Jeepy P. Compio)