SUBAY sa pagsugod na sa pilot implementation sa face-to-face classes sa lalawigan sa Sugbo, misaad ang liderato sa Kapitolyo nga abagan sa gikinahanglan nga school supplies ang mga tinun-an.
Si Gobernador Gwenolyn Garcia nipahibalo nga gikatakda nga ipang-apud-apod na sa kagamhanan ang school supplies alang sa mga magtutudlo ug tinun-an sa walo ka mga tunghaan nga ningpasar sa uwahing validation ug assessment sa Department of Health (DOH) isip pilot schools.
Alang sa supply sa notebooks, gikinahanglan pa kini nga ipaubos sa laing bidding sanglit mahal ang unang presyo nga ang nakuha sa supplier.
“I had to do a rebid for the notebooks kay labing taasa sa presyo and I hope this will follow, maapas. The other supplies are ready,” matod ni Garcia.
Sa 2020 una na nga misaad ang gobernador nga gahinan sa Kapitolyo og pundo ang mga tunghaan nga gipanglantawan nga makabalik na unya sa tradisyonal nga pagtungha liwas niining nasinating pandemya.
Ang Department of Education (DepEd) sa Oktubre 19 nianunsyo nga walo ka mga tunghaan sa probinsya ang gitugotan nga makapahigayon sa face-to-face classes karong Nobiyembre 15.
Nalakip sa mga tunghaan sa Sugbo nga gitugotan as pagbukas mao ang Basak Elementary School sa lungsod sa Samboan, Mahanlud Elementary School sa lungsod sa Malabuyoc), Cabagdalan Elementary School sa lungsod sa Balamban), Luyongbaybay Elementary School sa lungsof sa Bantayan, Cañang-Marcelo Luna National High School sa lungsods a Oslob, Busay National High School sa lungsod sa Moalboal, Pilar National High School sa lungsod sa Pilar ug Siocon Elementary School sa dakbayan sa Bogo. (ANV)