ILIBKAS ni Acting Mayor Michael Rama ang gipahamtang niyang suspension sa clinical trial sa WestVac Biopharma Co. Ltd. sa higayon nga makalagda na sila og memorandum of agreement (MOA).
Kini ang iyang gipadayag human nibisita sa iyang buhatan ang mga representante sa kompaniya pipila ka adlaw human niisyu og pamahayag si Rama sa paghunong sa ilang gibuhat gumikan sa kapakyas sa kompaniya pagpakigtambayayong sa City Government.
“The most important thing and the only way for them to proceed is with the memorandum of agreement approve by the City Council and authority for me to sign the MOA,” paghulagway ni Rama.
Atol sa courtesy call nga gipangulohan Dr. Jemala Ann Sanchez, clinical trial oncologist, nangayo sila og dispensa ngadto kang Rama nga gidawat sa mayor.
Si Rama niabiso sa grupo ni Sanchez sa pagtambong sa session aron usab pormal silang makapaila-ila ug mapahibawo ang Konseho nga gipangulohan ni Acting Vice Mayor Dondon Hontiveros ug majority floor leader Raymond Garcia.
Ang representante sa WestVac nangayo og sorry sa hawanan sa Konseho apan niingon nga dugay na sila sa clinical trial ug dili nila batasan ang pagpahibawo sa local government unit.
“I am humbled to ask for your forgiveness. I would like to apologize, it is not our practice to inform the LGU in any clinical trials that we have been conducting. We did not realize that it is also a public issue because it pertains to treating Covid and vaccines, so it was an oversight in our part, “pasabot pa ni Sanchez.
Si Garcia ningon nga naklaro na nga wala magpahibawo ang WestVac sa ilang kalihukan ug ni-kwestyon nganong wala makig-MOA ang ilang kompaniya sa City Government sanglit mao kini ang angay buhaton kay naglambigit kini sa taga Cebu City.
“I accept, Sir, that was an oversight on our part...Everything in our team is trained, all subjects...all 20,000 subjects for the whole PH, they have their own insurance, it is included in the inform process,” dugang ni Sanchez.
Gitug-an niya nga niabot na og 700 ka mga tawo ang ilang na-enroll ug bakunahan para sa ilang clinical trial para sa Covid vaccine.
Gihulagway ni Sanchez nga nakasinati og low grade fever, nausea, headache nga molanat usa hangtod duha ka adlaw nga maoy sagad side effect sa bakuna batok sa Covid-19.
Iyang gipahibawo nga aprobado na sa Food and Drugs Administration (FDA), Department of Science and Technology ug bang ahensiya sa gobyerno ang ilang pagpahigayon sa clinical trial diin adunay 8 ka sites sa Pilipinas.
Ang duha niini sa Ilo-Ilo City, Cebu City ug Palawan samtang ang mayoriya sa Luzon.
Giingong maka-produce ang WestVac og 100 million doses nga dako na og ikatabang niining panahon sa pandemya.
Si Garcia ug Konsehal Lea Japson nipasabot nga mahinungdanon ang MOA sama sa gibuhat kaniadto sa City Government dihang nilusad usab og ilang kaugalingon clinical trial ang dengue vaccine pipila na ka tuig ang nakalabay.
Ang acting mayor nagkanayon nga inig abot na unya sa MOA nga giandam sa duha ka habig ipa-review usab nita kini sa City Legal Office. (PAC)