DILI sundon ni Acting Mayor Michael Rama ang kamanduan sa Inter Agency Task Force (IATF) nga magsirado sa mga menteryo gikan Oktubre 29 hangtod Nobiyembre 2, 2021.
Si Rama nagkanayon nga pabiling epektibo ang iyang Directive No. 10-14-01 kun Oplan Kalagkalag nga maoy nagsibling basehan sa pag-abli sa mga menteryo sa dakbayan sa Sugbo sa Nobyembre 1 ug 2.
“Kadtong November 1 and 2 we will proceed. I had a talk with Secretary Carlito Galvez and I was telling him to bring the matter to Secretary Eduardo Año that as far as our celebration is concerned, we’ve long been preparing for it and we are only allowing fully vaccinated individuals to enter the cemetery,” matod ni Rama human sa iyang gipatawag nga tigom kagahapon sa hapon, Oktubre 20.
Ang IATF nipagawas og kamanduan nga sama sa 2020, ang mga sam-ang sa tibuok Pilipinas sirad-an aron dili magtapok ang daghang mga tawo.
“Dili ta makig-away pero pwede sad tang dili mosunod. Ato ni siyang han-ayon.” Dugang sa acting mayor.
Gihulagway niya nga wala magtakdo ang patakaran sa ang IATF kinsa maoy nagbutang sa Cebu City sa Alert Level 2 nga nagpaluag sa kalihukan sa katawhan samtang ilang idili ang pagbisita sa mga tawo nga moduaw lubong sa ilang minahal sa kinabuhi.
Gitug-an pa ni Rama nga andam siyang makighinabi ngadto ni Senator Bong Go, chairman sa committee on health sa Senado kinsa maoy sinaligan ni Presidente Duterte para ipahibawo ang tiunay nga sitwasyon sa dakbayan.
Si Rama nanghinaot nga respetohan ang local autonomy ug pasagdan ang local government unit nga modumala sanglit iyang nakita nga maayo pagkadumala sa Emergency Operation Center pinangulohan ni Konsehal Joel Garganera ang Covid-19 response.
Sa directive ni Rama, ang mga fully vaccianted individual nga mobisita sa menteryo gitagalan hangtod usa ka oras ug 50% ra ang gipatuman nga capacity sa mga menteryo aron malikayan ang pagkatap sa Covid-19.
Ang acting mayor nagkanayon nga dugay na nilang gihan-ay ang mga pamaagi aron mahimong hapsay ang adlaw sa Kalagkalag ug dili mosaka ang kaso sa Covid-19 nga karon naa na lang sa kapin 300 ka aktibong kaso sa nakalabay nga 10 ka adlaw. (PAC)