Inig-abot niya,
Dili ko dayon manumbaling.
Hinungdan nga kuhiton niya
Ang akong hinayhay nga kalipay.
Mao nga dali kong mowara-wara,
Kon uwahi na kong makabantay
Nga miabot na diay siya.
Mahipos dayon ang naggumon
Kong mga sugilanon.
Dayon gakson ko niyag hugot.
Huypan niya ang akong dunggan
Sa matam-is nga laylay
Ug ang hinayhay kong kalipay
Mopiko rag iyaha, mopahiluna
Sa kaban sulod sa akong dughan,
Paraygong mopauraray.
Apan kay siya bisita ra man
Dili siya magdugay.
Ug inigbiya niya mobalik na pod ko
Sa akong pag-inusara.