Dili ba angayan nga usa ka
motungtong nianang bantawan
kuptan ko usa ikaw uban
ang mga bituon sa kalangitan?
Lantawa gani og suway
ang nag-ambahang mga aninipot
sa kalangitan nga maoy nahimong
desinyo sa kagabhion.
Tutuki sab ang buwan sa dagat
nga gilawigan sa atong Ginuo
aron mahimong sulo sa pagtadlas
nato sa kangitngitan.
Hinayhinaya sila og lantaw,
hipusa sa imong pagtutok
kay ako dugay nang nanghipos
sa imong mga pahiyom.
Kon ako usa pa lang ka langitnon
nga nagliyo-liyo kanimo
kanunay ko ikawng tan-awon.
Dili ko mamilok sa kabuntagon
sa kaudtuhon ug sa kahapunon
tungod kay ang mga butang
nga nagliyong kanimo ug molibot
pa sa imo mismong kalibutan,
ako kana: ako ang tanom, adlaw,
kahoy, bituon, panganod, buwan.
Ikaw ang akong uniberso.
Dili ba angayan nga handurawon
ang katam-is sa talagsaong pagbati
nga daw gikan sa nagpuot nga dughan
sa bulkan nga mibugwak sa nagdilaab
nga kalipay sa naangkong kagawasan?