SUPERBALITA CEBU

Sugilanon: Ang tubag sa iyang pag-ampo

Ni Felixberto A. Esclamado Jr.

Saac II, Mactan, Lapu-Lapu City, Cebu


ALAGAD si Mary sa simbahan sa Holy Family sa ilang dakbayan, isip choir member ug mag-aawit sa mga kanta sa simbahan. Nakabaton siyag maanindot nga tingog nga gasa sa Diyos kaniya. Dili malikayan nga daghan ang modayeg kaniya, ilabi na sa mga ulitawo nga gustong mopadayag sa ilang gibati nga paghigugma ngadto kaniya. Usa kanila mao si Aniceto nga bag-ong nakatapos sa training sa pagka pulis. Nadani siya kang Mary tungod sa kaanindot sa tingog sa dalaga ug sa katahom niini nga mestisahon.

Gradwado si Mary sa kursong BSC-Accounting. May kaluha siya, si Gloria, usa ka magtutudlo sa publikong tunghaan sa ilang dapit. Gipalabi ni Mary ang pag-alagad sa simbahan aron mahiduol siya sa Ginuo ug dinhi gikahibalag niya si Aniceto. Kaniadto matag pauli ni Aniceto gikan sa tunghaan mohapit siyag simba, mao nga kanunay sila magkita si Mary ug nagkasuod. Nakapadayag na siya sa tinuod niyang gibati sa dalaga, apan hangtod karon wala pa siya sugta niini.

“Wa koy panahon nga mosulod anang gugma-gugma, Aniceto,” matod ni Mary usa ka higayon niana didto sa kumbento. “Kon pagbuot man sa Labawng Makagagahom ng mosulod ko pagka madre, nan, di gyud kita ang nalatid sa kapalaran nga magdayon.”

“Unsa? Mag-madre ka?” nahasinta si Aniceto nga mikupot sa duha ka kamot ni Mary. “Kaanugon! Sa imong kaanyag, mao nay naabot sa imong hunahuna? Nindot kag tingog. Anugon kaayo! Apan andam kong mo-sakripisyo tungod sa dako kong gugma kanimo.

Magpaabot ko nimo, Mary, nga mobali sa imong hukom.”

USA ka buntag samtang namisibis si Mary sa mga mesitas sa ilang tugkaran uban ni Gloria, miduol ang ilang amahan nga si Noy Gunio nga may hinungdanong tuyo kanila. Miduol siya kang Mary nga naglingkod sa nag-igdal nga gamot sa usa ka kahoy.

“Mary!” ni Noy Gunio.

“Ngano, Papa?” ni Mary nga gikulbaan kon unsay tuyo sa iyang amahan.

“Namatikdan kong seryuso si Aniceto sa iyang pagpaninguha nimo,” ni Noy Gunio. “Di ko mosupak sa inyong relasyon, ilabi na nga husto na kamo sa edad. Kon buhi pa unta si Mama Lily ninyo, segurado kong magmalipayon siya kon mahiluna na kamo sa kaminyuon.”

Nianang pagka hapon nakita ni Mary si Aniceto nga nagluhod sa likod sa lingkuranan sa simbahan nga sa iyang pangagpas may buot pangayuon sa Labawng Makagagahom. Hinay siyang miduol sa luyo sa ulitawo kinsa wala makadiparal kaniya. Nabati ni Mary ang mga pulong nga gilitok ni Aniceto.

“Diyos ko, ayaw itugot nga mahanaw kanako si Mary. Ayaw intawon siya himoang madre! Mahal ko siya!” matod ni Aniceto nga nag-ampo.

“Oo, tubagon ko ang imong pag-ampo, Dili ko na siya himuong madre!”

Nahibulong si Aniceto dihang nabati ang tubag sa iyang pag-ampo. Milingi siya ug nakita niya si Mary nga nahimuot kay siya man ang mitubag sa pag-ampo ni Aniceto. Mibati og kaulaw si Aniceto ug molakaw na unta, apan gikusnit ni Mary ang iyang kilid.

“Sige. Gisugot na tika, Aniceto. Nakahukom na ko nga dili na mosulod pagka madre,” ni Mary nga mikupot sa bukton ni Aniceto. Dayon nanggawas sila sa simbahan nga malipayon ang mga kasingkasing. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!