MGA ebidensya ug affidavit sa duha ka mga saksi sa pagbanhig-patay kang Richard Buscaino gipa-review sa Legal Division sa Police Regional Office (PRO) 7 atol sa labing unang meeting sa Special Investigation Task Group (SITG) aron lig-on ang kaso nga ilang ipasaka batok sa duha ka mga suspek.
Nagtagbo sa labing unang higayon sa Martes, Oktubre 19, ang naglangkob sa SITG nga nagtutok sa imbestigasyon sa pagpatay ni Buscaino, opisyal sa Alpha Kappa Rho sa Central Visayas, aron masusi ang mga ebedensya nga naa karon sa mga imbestigador.
Nitambong sa meeting ang mga abogado sa PRO 7 ug nisugyot sa SITG nga dili lang una pirmahan sa duha ka mga saksi ang ilang affidavit sanglit kinahanglan pa nga i-review aron masiguro nga lig-on ang pamahayag niini nga magtumbok sa nailhan na nga mga suspek.
Lakip sa gipa review sa legal division ang gihuptang mga ebedensya kung makabarog na ba sa korte kon hingpit na nga ipasaka ang kaso.
Una nang nibutyag si Police Lieutenant Colonel Wilbert Parilla, deputy city director for operations sa Cebu City Police Office (CCPO) nga pirmahan na sa duha ka mga saksi ang ilang pinanumpaang pamahayag alang sa pagpasaka sa kaso ngadto sa korte kon moabot na ang pamilya ni Buscaino nga naa pa karon sa kaulohan.
“Supposed to be kagahapon pirmahan na unta to ang affidavit sa atoang witness but we decided nga wala lang usa permahi kay considering nga karon ang first meeting sa atoang SITG, gi-subject for review ang tanang affidavits and evidences both documents ug katong mga witnesses para makompleto, ug atong masiguro nga insakto ug tukma gyud ang atong i-file nga kaso,” matod ni Parilla.
Masaligon hinuon si Parilla nga aduna na silay lig-ong ebidensya batok sa mga suspek sanglit positibo sila nga gitudlo sa mga saksi nga sila ang nagpusil kang Buscaino.
Human sa krimen, ang duha ka mga saksi gipatan-aw sa rogues gallery sa CCPO sa mga notadong gun-for-hire sa siyudad sa Sugbo.
Gitumbok nila kini nga maoy iyang nakita sa Tres de Abril, ang dapit diin gipusil si Buscaino.
Sa milabayng adlaw, mipasupot og kamandoan si PNP Chief Police General Guillermo Eleazar sa CCPO nga sulbaron sa labing dali nga panahon ang kamatayon ni Buscaino.
Gihimakak ni Parilla nga tungod sa mando ni Eleazar, na pressure na sila niini tungod kay bisan wala pa mohatag sa mando ang PNP Chief, aduna na silay suspek nunot sa pamahayag sa mga saksi.