NAILHAN na ang tag-iya sa motorsiklo nga gisakyan sa gunman nga nipusil patay sa usa ka supervisor sa lending company nga paingon na unta mokaon sa usa ka karenderiya sa dalan M.L. Quezon sa Barangay Cabancalan, dakbayan sa Mandaue, alas 9:00 sa buntag niadtong Martes, Oktubre 19.

Giila ang biktima nga si Glenn Salubod, 26, supervisor sa GLV Macaf Lending, taga Barangay Casuntingan, Mandaue Ciyty, naigo sa ulo nga hinungdan sa iyang hinanali nga kamatayon.

Bisan kon ila nang nailhan ang tag-iya sa motorsiklo, wa siya nibutyag sa ngan niini samtang ila pang susihon kini og maayo.

Ila kining nakuha pinaagi sa plate number sa motorsiklo.

Sa pakighinabi sa Superbalita Cebu kang P/Lt. Col. Eloveo Marquez, tigpamaba sa Mandaue City Police Office (MCPO), siya niingon nga sa ilang inisyal nga imbestigasyon, nisulod si Salubod sa kusina aron manghunaw sa dili pa mokaon.

Apan kalit lang nga adunay usa ka lalakr nga nagmotor nga misunod niya og gipusil siya sa ulo.

Sigon ni Marquez nga tungod sa samad pinusilan sa ulo, gideklarar si Salubod og dead on arrival pag-abot sa tambalanan.

Giklaro pa sab ni Marquez nga nagpadayon pa ang ilang pakighinabi sa pamilya ni Salubod kon aduna bay nadawat nga mga panghulga.

Apan, sa pagtan-aw nila sa cellphone niini, miingon si Marquez nga wala silay nakita nga pagpanghulga sa text messages niini.

Miingon sab si Marquez nga sa wala pa nagtrabaho sa iyang gitrabahoan si Salubod, nagtrabaho sab siya sa Manila isip lending collector. (KFD)