Tambagi ko Noy Kulas: Tungod ra sa yuta



Dear Noy Kulas,

Maayong adlaw kanimo, Noy Kulas. Minyo ako ug dunay mga anak. Dia mi nanimuyo sa laing nasud.

Mangayo kog tambag kanimo, Noy, kabahin sa akong napalit nga yuta dinha. Kay wala man ako dinha, ang akong igsuon akong gisugo paglantaw sa luna nga akong paliton. Nagpadala ako og salapi para sa yuta under sa iyang ngalan sa deed of absolute sale kay lagi wa man ako dinha, pero ako ang magbayad sa luna hangtod maimpas. Kon maimpas, mouli ko para sa paghikay sa titulo.

Ang plano gud nga sila ang magpuyo nga libre kon makabalay na mintras naa mi diri sa gawas sa nasud. Sila bale ang caretaker. Karon ang gusto sa akong igsuon nga apil siya sa ngalan sa titulo sa yuta ug balay kay ingkaso kuno og magkinaunsa kon mopanaw ko asa naman lang kono sila puniton kon mo take over akong mga anak.

Kon among duha sa akong igsuon ang naa sa titulo, unsaon na man lang sad akong mga anak ug bana kon mopanaw na ko? Asa man sad ilang karapatan sa yuta ug balay? Unsa man akong buhaton Noy? Palihug tambagi ko, Noy Kulas.

MHYRA

Mhyra,


Ayaw mo pagpinareho sa uban nga magsuon nga mag-away, naa pay magpinatyanay tungod sa yuta. Di gyud na maayo. Ang pagka managsuon ipatigbabaw, ayaw ang materyal.

Pila man diay na ka square meters ang luna nga imong gipalit? Kon sa imong tan-aw ma subdivide, diin mapahatan sila og bisan gamay apan igong kabalayan, nganong di mo man hatagan? Kon di man gani mahimo, tabangi siya nga makakita sila og ilang luna ug abagan mo sa bayranan agi og imong pahinungod niya sa paglakaw sa mga papelis sa imong yuta.Saboti ninyo ug estoryahe nga ang direksyon puro makaayo, di makadaut sa inyong relasyon. Sakto sab ka, nganong duhaon man ang ngan sa lote? Mahimo man nang buk-on kon makaya sa gidak-on. Konsulta usab og abogado kabahin sa ubang aspeto sa imong problema o tawo nga suhito ini.

NOY KULAS

kulassuper@sunstar.com.ph

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph