Hapit na magduha ka tuig nga gihasol kita niining pandemya. Sagad kanato nakalitan kay wala naanad hilabi na sa dihang gipahugtan ang mga siguridad sa tagsa tagsa ka utlanan sa mga lugar. Gibuhat kini aron dili mokuyanap ang makalilisang ug makamatay nga Covid-19.
Lisod na ang pag-uli sa tagsa tagsa ka dapit hilabi na sa laing mga probinsya kay daghan naman kaayo ang mga rekisitos aron ikaw makasulod sa lugar kon diin unta gilubong ang imong pusod. Mga pamilya di na kaayo magkakita-kita, hilabi na sa mga okasyon nga sa una bisan unsa ka hagip-ot sa panahon kay aduna man kitay mga trabaho mouli gayud aron maduaw ug makitag balik ang mga minahal sa kinabuhi. Malipay baya gayud kita nga makauban ang atong pamilya. Naa naman gud kini sa atoang dugo ug sa kulturang Pilipinhon nga pamilya, mao gayud ang una. Usahay maglisod pa gayud gani kita paglabang sa ilang gitawag nga kinse-traynta o adlaw nga tingsweldo kay unahon man nato og padala ang para sa mga nahibilin sa atoa. Ingon ana man gyud kita. Kana kon may trabaho pa ba ka.
Sakit huna-hunaon, daghan ang mga makaluluoy usab nga mga yanong mamumuo nga napapha sa ilang trabaho tungod kay mihinay man sad ang produksyon ug ang ekonomiya. Daghang wala na kabalik kay wa namay trabaho nga balikan. Unsa pa may balikan nga sagad sa mga gagmay nga patigayon, nanira na man. Subo lang palandungon. Daghan sa atoang kaigsuonan ang nawad-an og panginabuhian. Apan kahibalo na kita og Pinoy, kusog mangitag paagi makalabang lang niining krisis nga niagi sa atoang kinabuhi.
Ubanan lang gud nato og kinasingkasing nga pag-ampo nga unta mobalik na sa normal ang tanan. Niining nagkaduol na ang Pasko, sayod ako nga daghan na ang nagpanikad aron makauli sa tagsa tagsa nila nga mga lugar. Tiaw mo bay hapit duha ka tuig nga wala nay kitakita sa mga minahal sa kinabuhi.
Nagkaubos na man tuod ang kaso sa Covid-19, apan dili gihapon kita angay nga mokumpyansa. Sundon gihapon nato ang mga pahimangno sa paglikay sa mga tapoktapok, pagpanghugas sa kamot, pagsuot sa mask ug face shield ug ang pagpabakuna. Maghiusa kitang tanan aron ang Covid-19 atong mapukan.