SULOD sa walo ka mga semana, labing minos P7 na ang naumento sa presyo sa produktong petrolyo matag litro. Ning panahon pa sa pandemic nahitabo, diin nag-ilaid usab sa kalisod ang mga drayber sa pampublikong mga sakyanan.
Duna usab ni epekto sa presyo sa mga palaliton sa umaabot nga mga adlaw.
Komplikado ang mga hinungdan, apan usa sa dakong rason niini mao ang kakuwang sa supply itandi sa kadako sa panginahanglan. Moabot og 2.9 million ka barel sa produktong petrolyo ang kuwang matag adlaw itandi sa demand.
Nahitabo ni tungod sa paglihok sa mga ekonomiya sa lainlaing mga nasod nga malampusong nakakombate sa Covid-19. Usa niini mao ang China nga nagtinguhang magpundo og petrolyo.
Di maayo ang linugdangan ug padulngan niining nagsaka og maayo nga presyo sa gasolina tungod kay kinabag-an sa mga negusyo ug katawhan sa Pilipinas nag-ilaid pa sa kalisod sa epekto sa Covid-19. Duna pay mga dapit nga naa sa taas nga restrictions tungod sa mga kaso sa Delta variant sa Sars-CoV-2, kagaw nga nagdala sa coronavirus disease.
Nanghangyo ang Department of Energy (DOE) sa mga magbabalaud nga i-review ang Oil Deregulation Law aron mapangitaan og paagi unsaon pagtabang sa kagamhanan sa mga negusyo ug publiko kon dunay dakong umento, sama sa nahitabo karon. Nagapos ang kagamhanan, di makahimo og lakang sama sa pag-subsidize sa tipik sa umento o tibuok ba.
Lain sab nga mahimo sa kagamhanan mao ang posibleng pagsuspenso una sa mga buluhisan sa lana aron di mas momahal ang presyo matag litro. Kon magpadayon ug motabok kini sa P100 matag litro, kuyaig ang ekonomiya kay nagpadayon pa baya ang hinayhinay nga pagbangon niini.
Samtang sayo pa, kinahanglan nga mohimo nag lakang ang gobiyerno kay molanat pa nig taas kay ang mga nasod nga nagbaligya og lana mamawi baya na sa ilang alkanse.