GIINGONG usa ka milagro ang pagkaluwas sa usa ka pari sa pagkagupok sa iyang sakyanan human nabalintong kini alas 4:30 sa hapon niadtong Miyerkules, Oktubre 21, 2021, sa Antipas, Cotabato Province.
Ang pari mao si Fr. Ludwin "Noy" Alerta sa Diocese of Kidapawan City.
Sa taho sa kapulisan sa Antipas Municipal Police Station, nasayran nga sakay si Fr. Alerta sa iyang pick up nga sakyanan pabalik na unta sa Kidapawan City nga kusog ang pagbunok sa ulan ug huyop sa hangin.
Apan pag-abot sa pari sa Barangay Malatab sa Antipas, kalit lang miikis-ikis ang dagan sa pick up ug wala na niya makontrola ang manobela hinungdan sa pagkabalintong niini daplin sa kalsada.
Daling miresponde ang mga molupyo sa dapit ug gitabangan ang pari aron unta madala ngadto sa balay tambalanan.
Nasayran nga bisan bun-og o garas man lang sa lawas, walay nahiaguman si Fr. Alerta ug midumili nga siya dad-on ngadto sa ospital.
Nagpasalamat sab ang pamilya ug kaparian gumikan luwas nga nakauli sa Kidapawan City si Fr. Alerta giingong milagrong naluwas sa maong disgrasya. (Edgar E. Fuerzas)