GITAKDANG pasakaan og kaso ang mayoralty candidate nga nadakpan atol sa anti-illegal drugs operation sa mga awtoridad didto sa Midsayap, Cotabato Province alas 4:30 sa kaadlawon, Huwebes, Oktubre 21, 2021.
Ang dinakpan nga nailhang si Tom Nandang alyas Datukon Nandang, 52, minyo ug molupyo sa Barangay Upper Glad 1, Midsayap, magpapili nga mayor sa Northern Kabuntalan, Maguindanao Province sa taliabot nga eleksiyon.
Mag-atubang og kaso si Nandang sa paglapas sa Republic Act 9165 o Comprehensive Dangerous Drug Act of 2002 ug Illegal Possession of Firearms.
Lakip nga nadakpan ang pipila ka kabanay ug mga tawo ni Nandang sa dihang naabtan sa raiding team nga kauban sa suspek sulod sa iyang panimalay.
Matud ni Midsayap Chief of Police, Lieutenant Colonel Rolly Oranza nga gilusad ang anti-illegal drugs operation ug pagsilbi og search warrant sa mga sakop sa Philippine Drug Enforcement Agency (PDEA-Cotabato), kaabag ang kapulisan sa Midsayap Municipal Police Station ug 34th Infantry Battalion, Philippine Army sa balay sa suspek.
Wala na makapalag ang mga ginsakpan ni Nandang sa dihang napalibutan na sila sa mga awtoridad.
Narekober sulod sa balay ni Nandang ang usa ka kalibre .45 nga pistola, mga bala, magazines ug napulo ka pakite sa shabu nga nagkantidad og P5 milyon ug uban pang drug paraphernalia.
Gikanayon ni Oranza nga dugay na nga gitiktikan ang kalihukan ni Nandang sa mga awtoridad ug Miyerkules sa kaadlawon gilusad ang operasyon hinungdan sa iyang pagkasikop.
Sa pagsuwat ning balita, tingkagol na si Nandang, lakip na ang iyang mga kaubanan sa selda sa Midsayap Municipal Police Station samtang magpaabot nga masang-at ngadto sa korte ang ilang mga kaso.