ANG kanhi world champion nga si Donnie “Ahas” Nietes nakigkauban na sa laing Pinoy world champion nga si Nonito Donaire Jr. sa Probellum, ang bag-o ug nagkadako nga stable sa mga boksidor sa tibuok kalibutan.
Ang beterano na sa pagdumala og mga boksidor nga si Richard Schaefer, kinsa maoy presidente sa Probellum, maoy mianunsiyo niini sa Los Angeles, California niadtong Miyerkules, Oktubre 20, 2021 (RP time) ug sa samang higayon mibutyag nga si Nietes maoy ika-15 nga boksidor nga nakapirma sa bag-ong promotional boxing outfit.
“We’re pleased to welcome such an illustrious boxer like Donnie Nietes to the team,” matod ni Schaefer.
“We have seen the lower weight classes finally receive the praise they deserve in recent years, and Donnie is a key part of that stacked super-flyweight division.”
Si Nietes (42-1-5, 23 knockouts), kinsa maoy mibuak sa rekord ni Gabriel Elorde isip Filipino fighter nga pinakadugay’ng nakahupot og world title, nahimong champion sa super-flyweight, flyweight, light-flyweight ug minimumweight.
Mapasalamaton ang kanhi sakop ug superstar fighter sa nasira nga Cebu-based Ala Boxing Gym sa kahigayunan nga gihatag sa Probellum ngadto kaniya.
Hinuon ang taho nga napatik sa Spin.ph wala maglakbit sa MTK Global, D4G Promotions, ang laing promotional boxing outfit nga gipirmahan sa lumad nga taga Murcial, Negros Occidental.
Sa kasamtangan, si Nietes padayong nag-ensayo sa Villamor Brothers Gym sa Mandaue City.
Sa iyang mensahe sa Superbalita Cebu pinaagi sa Facebook messenger, nagknayon si NIetes nga dako ang iyang kalipay nga nakapirma siya sa Probellum.
"Malipayon kaayo ko nga naa pud bag-o nga interesado sa akoa ug nanghianot ko nga mahatagan ko nila og dagkong mga away," mensahe ni Nietes.
Si Nietes, kinsa nag-edad og 39, taodtaod na sab nga nangandoy nga makontra ang labing dagko og mga pangalan sa iyang timbang apan wala kini nahitabo.(JBM)