PADAYONG nagbangutan ang Sugboanong higante nga si Junemar Fajardo sa iyang pag-uli sa ilahang panimalay sa lungsod sa Pinamungajan, Cebu gumikan sa kamatayon sa iyang pinanggang inahan nga si Marites.
Sa labing unang higayon, personal nga nasaksihan sa pambatong sa San Miguel Beermen sa Philippine Basketball Association (PBA) ang urna nga gisudlan sa abo sa iyang inahan.
Pinaagi sa iyang Instagram account, gipabuhagay ni Fajardo ang iyang emosyon sa iyang pagbalik sa ilaha ning higayuna.
“Not the kind of homecoming we want but it is what it is. We know you’re in a better place now, Mama. No more stress, pain and suffering just peace. I love you and miss you forever! ‘Til we meet again, Mama!,” post sa produkto sa University of Cebu (UC) Webmasters, kinsa miangkon nga usa ka mama’s boy.
Ang inahan ni Fajardo nipanaw sa laing kalibutan niadto pa’ng Agusto 11, 2021 apan karon pa nitugot ang kahigayunan nga makauli ang 6-time PBA MVP.
Niadtong higayuna, grabe pa ka hugot ang restriksyon sa pagbiyahe tungod sa kaso sa Covid-19 hinungdan nga natanggong si Fajardo sa Manila.
Natunong sab nga nagkampanya na'g sugod ang Beermen sa Philippine Cup diin nikombati si Fajardo nga nagsakripisyo sa kamingaw sa iyang inayan.
Ning bag-uhay lang, nanamilit ang Beermen sa Philippine Cup human sila napukan sa TNT Tropang Giga sa deciding Game 7 sa ilang semi-finals series.
Wala maglangan si Fajardo ug gihikay dayon niya ang iyang pag-uli sa Sugbo alang sa iyang inahan.(ESL)