MIPAGAWAS og kamanduan ang Department of the Interior and Local Government (DILG) nga sirad-an ang mga sementeryo gikan sa Oktubre 29 hangtod sa Nobiyembre 2 atol sa All Saints Day ug All Souls Day aron kalikayan ang tinakdanay sa Covid-19. Una niini, naglainlain ang baruganan sa local government units (LGUs) sa pag-obserbar sa Adlaw sa mga Minatay. Sama sa metro cities, ang Cebu City nagplano sa pagbukas sa mga sementeryo sa maong mga adlaw alang sa mga bakunado na. Samtang sa Mandaue ug Lapu-Lapu Cities sirado ang tanang mga sam-ang.
Si Gobernador Gwen Garcia mihatag og katungod sa mga mayor sa lalawigan kon unsa ang ilang guidelines nga ipatuman. Mobukas ba sila o dili. Apan nunot niining kamanduan sa DILG, pursigudo ang mga mayor sa pagsunod kay alang kini sa kaayuhan sa tanan.
Apan si Cebu City Acting Mayor Mike Rama mosupak sa kamandauan sa DILG ug Inter-Agency Task Force (IATF) kay matod niya buksan ang mga sementeryo alang sa mga bakunado. Unang misugyot niini ang Simbahang Katoliko. Ambot wala ko makasabot sa baruganan ni Rama. Nganong ipamugos man niya nga ania pa man ang hulga sa virus? Nahadlok ba siya sa taga Simbahan o iyang gipamulitika ang pagbukas sa mga sementeryo kay dili siya gusto nga mahisagmuyo ang taga Simbahan? Mas giuna ba ni Mike ang pamulitika kay sa paghatag og proteksiyon sa panglawas sa katawhan?
ROLE MODEL
Gisaway ni Rama ang pipila ka barangay captains nga wala pa nagpabakuna o wala manghingusog sa kampanya aron pagdani sa ilang konstituwente nga magpabakuna. Matod ni Mike nga ang mga kapitan mao unta ang “role model” ug angay unta nga maoy nag-una. May punto si Mike. Apan ania gihapon kita sa demokrasya, dili kita makapugos sa usa ka tawo nga magpabakuna labi pa kay walay balaod nga nagmando sa katawhan nga magpabakuna. Atong respituhan ang ilang katungod. Apan sa dili pa mamugos si Mike sa mga opisyal sa barangay o sa pribadong mga tawo, nganong dili man niya pugson ang mga kawani sa City Hall nga maoy unang magpabakuna? Bakunado na ba ang tanang mga empleyado sa City Hall? (bobbygnalzaro@gmail.com)