Rabacal: Partido ug kandidato

UNSA may gamit sa political party sa usa ka kandidato? Nasayod na kita nga ang partido maoy mo-isyu og certificate of nomination and acceptance (Cona) usa siya maka-file sa iyang certificate of candidacy (COC) sa eleksiyon. Kini usab ang moendosar og kandidato nga ihulip panahon sa substitution. Makahimo usab kini sa pag-abag sa ilang kandidato may labut sa legal nga galastuhan sa kampanya. Makapadaug ba ang partido sa mga kandidato nga molansar ubos niini?

Kini ang dili masiguro labi na kay daghan kaayong mga bag-ong political party ang gipanggamit karon sa mga kandidato. Ang mga kandidato ug ang ilang partido mao ang mosunod: Bato dela Rosa - PDP-Laban (Cusi wing); Leni Robredo--Independent; Manny Pacquiao–PDP-Promdi; Ping Lacsaon–Partido para sa Demokratikong Reporma; Isko Domagoso–Aksyon Demokratiko; Bongbong Marcos–Partido Federal ng Pilipinas; Norberto Gonzales–Partido Demokratiko Sosyalista ng Pilipinas; ug Anna Capela Velasco–Lakas-CMD. Makumbinsi kaha ang mga botante niining maong mga partido?

Kita nasayud nga maantigo nang mamili ang mga botante. Dili na usab madala ang tanang mga botante bisan sa piniling kandidato sa ilang mayor. Botaran nila ang ilang local nga kandidato apan dili sila pabuot kon si kinsa ang ilang pili-ong kandidato pagka-presidente ug bise presidente. Sa ato pa, dili na makapanghambug ang local leader nga ilang magawngan ang mga botante alang sa ilang kandidato. Nasuwayan na kini sa panahon ni presidential candidate Ramon Mitra, Jr. ug ni Presidente Rodrigo Duterte. Hapit tanang mga kongresista ug mga mayor iya ni Mitra apan napildi gihapon siya ni Fidel Ramos. Si Duterte way mga dagkung lider sa Sugbo ug sa daghang mga dapit sa nasud apan siya ang midaug pagka-presidente ubos sa PDP – Laban nga niadtong panahuna usa ka partidong nagtinga.

Kataw-anan kining nahitabo sa PDP-Laban. Mao kini ang partido nga gisakyan ni Duterte niadtong milabay nga eleksiyon. Nagpinal na kining maong partido hangtud nga misikat kay nakapadaug og presidente. Gi-ilogan na kini sa mga pulitiko mao nga natunga kini ngadto sa Cusi wing ug Pimentel wing. Gipaabot sa katawhan nga kining PDP-Laban (Cusi wing) maoy mahimong dominant political party tungod kang Presidente Duterte. Apan sila man hinuon ang way klaro og mga kandidato. Gisaway hinuon sila sa ilang kaatbang nga nangilog kunog partido apan wala diay klarong kandidato. (mannyrabacal1144@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph