Dear Papa Joe.
Ako si Jun Jun 27 years old, may kapuyo. Naa mi sa Lahug karon nanimuyo ug wala pa sad miy anak.
Kining akong kapuyo mura ra ni siya og napugos og live-in nako kay wa siyay kapuy-an siguro kay silingan man mi ani niya sa Negros. Mao sad siguroy hinungdan na wa mi magkaanak kay di gyud siguro siya ready gyud nako mao nag control lang siya o may laing rason.
Kini siya nag work ni siya sa Lapu-Lapu isip factory worker. Naa koy mga kaila sad didto nga sige og sulti nako nga pabantayan nako akong pares kay naa kunoy kuyog permi lalake. Pero kon akong pangutan-on mo deny siya ug moingon pa nga kon magsige daw ko og duda, biyaan ko niya total makabuhi na siya sa iyang kaugalingon kay toxic kuno ko. Mao nagpugong lang ko hangtud nga sa kalit lang, panahon sa tingtrabaho nanawag siya nako kay nadisgrasya sa motor sa Busay pero wa siya mo tug-an nako kon nag unsa siya o kinsay iyang kuyog. Igo ra ko sa pagtabang niya pero tak-om siya tanan. Unsay buhaton ko?
JUNJUN
JunJun,
Ayaw palabi og pa martyr, Dong, kon harapharapan na nimo ang iyang gibuhat. Kana kay niabot sa laing lugar ug nadisgrasya ug wa pa gyud mosulti kinsay iyang kuyog, klaro na kaayo na ug mismo na gani ang kahigayunan mao nag pamatuod nga naa siyay lain.
Kon di gyud siya para nimo, ayaw pamugos. Ayaw usiki ang panahon nga makig uban ka sa way klaro nga murag time bomb. Naghuwat lang sa oras nga ma wa siya nimo sa dayon.Toxic nana.
PAPA JOE
( sa inyong tampo ipadala sa papajoesuperb@gmail.com)