KAPIN sa 90 porsyento sa mga vendor sa merkado publiko sa Carbon nagsuporta sa modernisasyon kay sila nasayod sa maayong epekto niini ngadto kanila. Hamugaway ang ilang pagpaninda ug mas modani pa kini og daghang mga mamalitay kay kon bisan moanindot ang dapit, giseguro sa C2W nga di momahal ang mga palaliton sukwahi sa propaganda sa mga nangsupak.
Apan ang gamay nga portion sa mga manindahay maoy langas kaayo. Apan kahibulongan usab kay kon sila magrali, modaghan. Matod sa vendors nga uyon sa modernisasyon, nganong ang supak kaayo kadto mang di direktang apektado sa proyekto.
Mosaka ang kita sa Siyudad gikan sa Carbon market. Daghan usab nga trabaho ang mamugna sa merkado publiko kay duna na may madugang nga mga negusyo sa dapit. Sukad pa kaniadto, makita ang kagamay ra sa kalamboan sa Carbon. Nalansang ang iyang kalambuan sulod na sa daghang katuigan.
Kon matuman ang tanang mga plano nga way kakulian sa mosunod nga lima ka mga tuig, di lang kay mga Sugboanon lang ang manganha sa Carbon, lakip na gani ang daghang mga turistang langyaw.
Mokita na usab ang mga lumolupyo sa mga barangay nga naglibot ug naa duol sa Carbon kay ang ilang mga lumolupyo maoy prayoridad sa trabaho.
Kadto sang dunay mga abilidad sama sa panghilot, card reading ug uban pa, butangan usab og pwesto.
Gawas sa ekonomikangong aspeto, mahimong hamugaway ang Carbon nga karon lang-og ug hitak kon ting-uwan. Daghang mga dapit nga magbiaw ang tubig ug mamilit ang lapok.
Bisan unsaon pa sa pagkwentada, kon matuman ang tanang mga plano, dako og ikatampo pinaagi sa direkta ug di direktang buhis sa Siyudad sa Sugbo ang modernong Carbon.
Ang Cebu City maoy labing malambuon nga dapit gawas sa Metro Manila. Busa, angay usab nga ang iyang merkado publiko pang world class, sarang nga ikapasigarbo.