4 ka menor nga babaye missing

UPAT ka mga menor de edad nga babaye ang gikatahong missing kagahapon, Oktubre 21, 2021.

Nabutyag kini human ang mga ginikanan sa 12 anyos nga dalagita nidangop sa kapulisan human na-missing ang ilang anak ug gituohang milayas uban sa barkada niini sukad niadtong Oktubre 18, 2021.

Ang magtiayong Sheila Ann ug Paulo Alam-alam nabalaka nga wala pa mopauli ang ilang anak nga si Mikaela Ayesha, 12, taga Tierra Grande Residences sa Barangay Lawaan, Siyudad sa Talisay.

Matod ni Paulo nga wala sila sa ilang balay niadtong tungura atol sa paglakaw sa bata ug pulos naa sa trabahoan.

Giangkon sa amahan nga ilang nakasab-an ang dalagita tungod sa iyang pagdesiplina niini nga usa sa gituohan nga hinungdan nga milayas kini kauban sa iyang classmate.

Sa ilang pagpamauli, gisubayan nalang sila sa ilang yaya nga milakaw ang ilang anak uban sa iyang classmate ug barkada nga si Jea Mae Abellana.

Giingong giagni ni Mikaela ang ilang yaya uban sa usa ka tuig nga manghod niini nga mogawas sila sa balay apan mibalik, matod pa, sa sulod ug gilipat lang ang yaya niini ug dayong sibat.

“Pagka hitabo ato wala man gud mi sa balay kay duty mi sa akung paris pulos mi sa Cebu City ga-work, so, mao to pag abot namo misulti to among yaya nga si Mika wala na sa among balay nilakaw nikuyog atong iyang classmate,” matod ni Paulo.

Wala silay contact sa ilang anak gumikan kay ang cellular phone niini gibilin man usab kini.

Nagpa-blotter sila sa Sawang Calero Police Station ug nag-abot sa nagbuhi o guardian ni Jea Mae Abellana ug mibutyag usab kini nga lakip nga missing ug wala na mopauli sa ilang balay.

Ang pamilyang Alam-alam kanhi nagpuyo sa Tisa, siyudad sa Sugbo ug kanhi kaklase sa ilang anak si Abellana.

Gisuwayan sa pagtawag ang cellular phone ni Jea apan igo lang kini nga paminawon ug dili motingog sa pikas linya.

Aduna matod pay nakakita nga netizen sa usa ka fastfood chain sa dalan Colon nga nangaon silang Mikaela ug Jea sigun sa paghulagway niini.

Matod sa amahan nga natingala sila nganong nabuhat kadto sa iyang anak tungod kay wala man kini mopakita og kasuko kanila bisan pa man nga makasab-an kini kanunay.

Lakip sa na missing usab karon ang duha niya ka classmate nga suod sa iyang anak ug si Jea Mae nga pulos nangita na ang mga ginikanan niini ug nagpatabang na sa kapulisan.

Si Police Lieutenant Colonel Wilbert Parilla, deputy city director for operation sa Cebu City Police Office (CCPO), nagkanayon nga ilang ipakatap sa mga police station ang hulagway sa bata dungan sa saad nga ila tabangan ang ginikanan nga mangita sa ilang na wala nga anak.

Dason n Parilla, dili usab kini matawag nga kidnapping diin walay dautang elemento nga nagpugos sa pagdagit sa dalagita.

“Ang atong mahimo sa kapulisan ato silang tabangan, ato ning ihatag sa tanang stations nato sa Cebu City and even we have to give this sa atoang neighboring nga City Police Office para matabangan sad nato ang ginikanan pag-locate sa iyahang anak,” matod ni Parilla.

Nagtuo si Paulo nga naa ra dinhi sa siyudad sa Sugbo ang iyang anak dungan sa panghinaot nga naa kini sa maayong kahimtang ug wala mahilabti.

Nanawagan siya sa bata ug sa mga tawo nga adunay kasayuran sa nahimutangan niini nga mo-report dayon sa labing duol nga police station.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph