P17M gihatag ni Frasco sa 3 ka ospital

Cebu Fifth District Congressman Vincent Franco “Duke” Frasco (Gikan sa Facebook ni Congressman Duke Frasco)
Cebu Fifth District Congressman Vincent Franco “Duke” Frasco (Gikan sa Facebook ni Congressman Duke Frasco)

SA pagtabang sa mga kabus nga pasyente nga anaa na-admit sa mga pribadong hospital sa Sugbo, moabot sa P17 milyones nga tseke ang gihatag ni Cebu Fifth District Congressman Vincent Franco “Duke” Frasco sa tulo ka mga tambalanan sa Sugbo pinaagi sa Department of Health (DOH).

Nalakip sa mga benepisaryo sa pundo ang Mendero Medical Center sa lungsod sa Consolacion, Cebu Doctors’ Hospital ug Perpetual Succour Hospital sa dakbayan sa Sugbo.

Tuyo ni Frasco nga mahatagan og abag ang mga Sugboanong pasyente gikan sa kinto distrito nga labing nagkinahanglan bisan pa og anaa kini nalandig sa mga pribadong tambalanan.

Gawas sa naasoyng mga hospital, gigahinan usab sa kongresista og pundo ang mga pampublikong hospital sama sa Vicente Sotto Memorial Medical Center nga nahimutang sa dakbayan sa Sugbo, lakip na ang Eversley Child Sanitarium and General Hospital sa Mandaue City, Cebu Provincial Hospitals sa Danao City, Juan B. Dosado Memorial Hospital sa Sogod, ug Ricardo Maningo Memorial Hospital sa San Francisco, isla sa Camotes.

Gawas sa pundo sa mga pasyente, unom usab ka bag-ong mga ambulansya ang gi-turnover niini sa lungsod sa Borbon.

Usa ka balaudnon alang sa pagtukod sa Liloan Children’s Hospital ang giduso na ni Frasco sa Ubos Balay balauranan ug pending sa pagtuki sa Senado.

Atol sa naasoyng turnover, lakip sa nitambong sila si DOH-7 Regional Director Jaime Bernadas, Assistant Regional Director Guy Perez, Sr. Gaudelia Baluyot sa Perpetual Succour Hospital, Engr. Huriel Alejandro sa Cebu Doctors’ Hospital ug Dr. Samuel Mendero III sa Mendero Medical Center.

Sa samang adlaw, gitugyan usab ni Frasco ang unom ka brand new nga mga abulansya ngadto sa unom ka mga barangay sa lungsod sa Borbon.

Matod ni Frasco nga bahandi karon ang panglawas labina karon sa pandemic nga maoy padayon niyang giprayoridad nga programa alang sa iyang mga konstituente.

Sa distrito si Frasco dunay 10, ka scholars alang sa tuig tigtungha 2021-2022.(ANV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph