GIAWHAG sa kagamhanan sa lungsod sa Bantayan ang senior citizens ug mga batan-on nga ang edad 15 paubos sa pagpanagkot na lang sa altar sa ilang panimalay sanglit dili pasudlon sa mga sementeryo atol sa pag-obserbar sa Kalagkalag.
Gitugot ang pagbisita sa mga sementeryo sugod Oktubre 23, Sabado, hangtod sa Oktubre 28.
Aron hapsay ug dili maghuot atol sa pagbisita, gipatuman ang schedule sa matag barangay.
Alang sa mga barangay nga natumong sa pagbisita sa buntag, mahimong mo duaw gikan sa alas 8:00 sa buntag hangtod na sa alas 12:00 sa udto.
Alang sa mga naka-schedule sa hapon, mahimong makabisita gikan ala 1:00 sa hapon ngadto sa alas 6:00 sa hapon.
Mahimong makabisita sa mga sam-ang ang mga residente sa mga mosunod nga barangay:
Oktubre 23-Barangay Patao, Luyongbaybay ug Kabangbang; Oktubre 24-Barangay Kabac, Doong, Oboob ug Putian; Oktubre 25-Barangay Baod, Guiwanon, Hilotongan, Kangkaibe ug Suba; Oktubre 26-Barangay Atop-Atop, Sillon, Lipayran, Tamiao ug Mojon; Oktubre 27-Barangay Sulangan, Sungko, Sulangan islets, Binaobao ug Bantigue; ug Oktubre 28-Barangay Kamginggan, Botigue ug Ticad.
Ang kagamhanan, adunay public assistance desk nga ibutang sa Bantayan Public Cemetery, Chinese Cemetery, Eternal Garden, Kampingganon Cemetery, LGU Cemetery, ug Doong Cemetery sa tibuok semana pagsiguro nga nahisubay sa lagda.
Tulo ka mga barangay tanods sa matag sementeryo ang ipakatap. (ANV)