SECTIONS
Superbalita Cebu
Saturday, December 04, 2021
SUPERBALITA CEBU

Super Suroy: Tinubdan sa kapeng lamian ang Tuburan

UNA nakong nadunggan ang tanaman sa kape sa Lungod sa Tuburan, Lalawigan sa Sugbo niadtong sayong bahin sa 2010.

Nilabay ang pipila ka tuig nahimong inila ang Tuburan tungod sa ilang produktong kape.

Gani mi-ani na ang maong lungsod og mga nagkadaiyang pasidungog gikan sa local ug nasudnon nga award giving body.

Wa damha, gidapit ko sa ilang lokal nga kagamhanan ug sa inilang tigpasiugda sa Grassroots Travel nga si Boboi Costas hinungdan nga nasuroy ko sa Tuburan Cofee Farm.

Atol niadtong higayona gisaulog ang International Coffee Day niadtong Oktubre 1, 2021.

Ang Tuburan Coffee farm ang mipasiugda sa konsepto nga ‘coffee farm-to-table’ dinhi sa Cebu nga gi-isip kini nga homegrown brand.

COFFEE FARM

Sa kaburikan sa Tuburan sa Kabankalan, naglibot ang tanaman sa kape naglakip sa Robusta beans ug laing matang sa Arabica.

Sayon ra adtoon ang Tuburan Coffee farm, ilabi na kun aduna kay kaugalingong sakyanan.

Sa ibabaw sa plantasyon sa kape, adunay gamay nga pasilidad diin mahimong matilawan ang maong kape ug maoy nagsilbing pundohanan sa mga produkto naglakip sa coffee beans ug mga drip bags.

Masaksihan sab ang proseso sa pagpadaghan sa tanom, buwaranan ug uban pang mga kahimanan sa pagproseso sa coffee beans.

PAGSUGOD

Ang Tuburan Coffee mao ang una nga homegrown nga brand sa kape sa Cebu.

Nagsugod ang farm isip usa sa mga solusyon sa iligal nga pagpangahoy ug paghatag sa panginabuhian sa mga lumulupyo kaniadto nga gipasi-ugdahan sa kanhi mayor ug karon Bise Mayor Democrito Diamante Jr.

Kaniadto, grabe ang illegal nga pagpamutol sa mga punoan sa kahoy sa tuyo nga mokita gikan sa paghimo og uling, sumala pa ni Diamante.

Ang lokal nga kagamhanan inabagan sa Department of Environment and Natural Resources - National Greening Program namugna ang pagtukod og coffee farm, hulip sa naguba nga kinaiyahan.

Sa maong paagi, kahatagan sab og panginabuhian ang mga lumolopyo.

MASUWAYAN

Sa among paghidangat sa maong dapit, lain kining kasinatian tungod kay dili lamang igo ikaw nga mosaksi sa proseso.

Kay mismo ang mga mosuroy mamahimong mamupo sa mga hinog nang bunga sa kape, aron nga i-proseso.

Tuyo ni Diamante nga laing kasinatian ang matamgamtan sa katawhan, nga buksan ang maong coffee farm sa publiko aron mahibaw-an ang paagi kon giunsa paghimo ang ang kape nga paborito natong imnon - gikan sa pagpananom, pag –ugmad, pag-roast ug ang packaging sa matag produkto.

Ma-isip nga lifetime experience ang maong kahigayonan.

Sa buot mobisita ug masulayan ang maong kasinatian, mamahimong magpa-book ug appointment sa opisina niini aron ma-skedyul sa tour.

Kadtong mga interesado mahimo moduaw sa Facebook page sa Tuburan Coffee.

CAFE

Gawas sa maong plantasyon mamahimo masuwayan ang mga produkto sa Tuburan Cafe nga nahimutang sa dalan Burgos eskina sa dalan Estrella, Barangay 6.

Ang 75-seater café wala lamang nagtanyag sa lokal nga mga kape, adunay lattes ug mga espesyal nga flavor sama sa Chocolate, Caramel, Hazelnut ug Vanilla Frooze.

Aduna sab silay mga pastry aron makumpleto ang imong katagbawan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!