WAY kabutangan ang kalipay sa mga ginikanan ni Mikaela Ayesa Alam Alam, human siya “naluwas” sa kapulisan uban sa iyang higala alas 2 sa kaadlawon sa Biyernes, Oktubre 22, 2021 sa sulod sa usa ka lodging house sa lungsod sa Samboan, habagatang Sugbo.
Si Shiela, inahan ni Mikaela, nipadayag nga mapasalamaton sila sa Ginuo nga maayo ang kahimtang sa ilang anak ug higala niini.
Ang duha tipik sa upat ka mga menor nga missing.
Nagpasalamat sab sa kapulisan ang mga ginikanan ni Mikaela gumikan sa daling aksyon nga gihimo human makadawat og impormasyon sa nahimutangan sa duha.
Gipasalamatan sab nila ang mga tawo nga mitabang nga makit-an ilang anak.
ILANG ROTA
Gibutyag ni Mikaela nga siya ug iyang higala nga si Jea Mae Abellana, 13, mosakay na unta og barko sa pantalan sa dakbayan sa Toledo paingon sa San Carlos City, Negros Occidental niadtong Lunes, Oktubre 18.
Apan wala sila makasakay kay gipangitaan sila og swab test sa mga awtoridad busa dali silang namalik sa Cebu City diin sila nagpalabay sa kagabhion.
Ningsakay sila og bus paingon sa lungsod sa Samboan sa Martes kay namasin nga makasakay, apan napakyas gihapon tungod kay wa gihapoy swab test.
Ang duha napugos na lang sa pagpuyo sa usa ka lodging house diin sila nagpalabay sa kagabhion.
Si Police Corporal Eleazar Belciña sa Talisay City Police Station nga nahinabi sa dySS Super Radyo nagkanayon nga dihang nadawat nila ang impormasyon nga nakit-an ang mga bata sa Samboan sa Huwebes, nakig-alayon gilayon sila sa kapulisan sa lungsod.
Uban ang mga ginikanan sa bata mibiyahe sila sa Bato, San Sebastian, lungsod sa Samboan sa Huwebes sa gabii.
Ilang naabtan ang duha sa lodging house nga ilang gikatulgan.
Matod ni Belciña nga si Abellana maoy nigasto sa mga lakaw ug kaon kay dunay natigom nga kwarta nga P15,000.
NAHIUBOS
Si Sheila niingon nga nahiubos kanila si Mikaela kay nagtuo nga wala na nila atimana kay ang manghud niini ang ilang gitutukan.
Naghilak siyang nangayog pasaylo ngadto sa iyang anak.
Nilayas ang ilang anak kauban ni Mae niadtong Lunes sa hapon gikan sa ilang balay sa Barangay Lawaan 1, Dakbayan sa Talisay.
Si Mae taga Concepcion, Barangay Suba, Dakbayan sa Sugbo. Naa siya nagpuyo uban sa iyang iyaan.
Si Belciña nibutyag nga ang cellphone ni Abellana ilang i-turnover sa Anti-Cyber Crime Unit aron masuta kon duna bay contact sa Negros.
Ang mga bata kasamtangan gitugyan ngadto sa Department of Social Welfare and Development (DSWD) alang sa stress debriefing.