ANG Cebu City Government (CCG) pinaagi sa City Health Department (CHD) nipahigayon sa ilang ceremonial vaccination ngadto sa 150 ka mga tinun-an sa kolehiyo sa Universiy of Cebu (UC) Banilad campus, Oktubre 22, 2021.
Si Dr. Jeffrey Ibones, pangulo sa CHD, nagkanayon nga target sa CCG nga makabakuna sila og 65,000 ka mga estudyante isip preparasyon kon tugotan na ang face-to-face classes.
Ang nilangkob sa ceremonial vaccination mao ang mga tinun-an sa Maritime, Engineering, Tourism ug allied medical courses.
Gipadayag ni Ibones nga mahimong makaadto sa vaccination sites sa Cebu City ang college students, magdala lang sa ilang mga identification card (ID), study load ug kinahanglan nga rehistrado sila sa Pabakunata.com.
Gipahibawo ni Ibones nga adunay igong suplay sa bakuna para mga molupyo sa Cebu City ug kadtong nagtungha sa mga unibersidad sa dakbayan.
Gibutyag sa pangulo CHD nga adunay kapin 30,000 ka doses sa bakuna nga anaa karon sa kustodiya nga maoy ilang gamiton para sa pagpadayon sa vaccination rollout sa dakbayan.
Sa kasamtangan, ang Cebu City adunay 342,719 ka mga individual ang fully vaccinated na.
Samtang, adunay 403,273 ang first dose gikan sa 776,027 ka mga tawo ang nagpalista nga magpabakuna.(PAC)