Alec Baldwin nakapusil-patay

AKSIDENTE nga napusilan patay sa Hollywood actor Alec Baldwin ang cinematographer ug naka-angol sa direktor didto sa set sa pelikulang “Rust.”

Ang maong aksidente nahitabo niadtong Huwebes, Oktubre 21 didto sa New Mexico, USA diin gihimong ang shooting.

Taho sa CNN Entertainment nga samtang nagpadayon ang shooting alang sa maong pelikula, gikuhaan og eksena ang aktor nga migamit og prop firearm.

Sa pagbuto niini, mitama ang gibuga nga bala ngadto sa director sa photography nga si Halyna Hutchins, 42, kinsa gidali og tabang pinaagi sa pagluwan niini sa helicopter paingon sa University of New Mexico Hospital.

Apan gideklarar sa mga mananambal nga dead-on-arrival si Hutchins.

Samtang ang laing samaron mao ang movie direktor nga si Joel Souza, 48, nga gidala sab sa tambalanan apan wa pay update sa iyang kondisyon atol niining pagsuwat.

“According to investigators it appears that the scene being filmed involved the use of a prop firearm when it was discharged.”

“Detectives are investigating how and what type of projectile was discharged,” press statement sa Santa Fe County Sheriff Office.

Ang pelikulang “Rust” usa ka Western film set niadtong panahon sa 1880 diin bida si Baldwin, Travis Fimmel ug Jensen Ackles.

Ang mga international news site nagpaabot sa reaction o tubag gikan sa production company o representante ni Baldwin kalabot sa maong hitabo. (FVQ)